ამ დროისთვის, ასეთი საკითხი ჩვენს დღის წესრიგში არ დგას. თუნიანი აზერბაიჯანიდან გაზის ყიდვის შესაძლებლობის შესახებ
ამ დროისთვის სომხეთის დღის წესრიგში არ დგას აზერბაიჯანიდან გაზის ყიდვის საკითხი, რუსული გაზი და ირანული გაზი სრულად აკმაყოფილებს სომხეთის ეკონომიკის მოთხოვნას.
ამის შესახებ ჟურნალისტებთან საუბარში განაცხადა პარლამენტის ფრაქცია „სამოქალაქო შეთანხმების“ დეპუტატმა ბაბკენ თუნიანმა.
„იმ ინფორმაციით, რაც მე მაქვს, წინასწარი შეთანხმება არ არის. ასეთი დისკუსიები არ ყოფილა. მაგრამ, თუ არის ქვეყანა, რომელიც ყიდის გაზს და არის ქვეყანა, რომელსაც სჭირდება გაზი და თუ რაიმე დაბრკოლება არ არსებობს, მაშინ ყველაფერი განსახილველია. მაგრამ ამ დროისთვის არანაირი შეთანხმება ან წინასწარი თანხმობა არ არსებობს“, – განაცხადა თუნიანმა.
დეპუტატის თქმით, სომხეთს ან სხვა ქვეყანას მნიშვნელობა არ აქვს, საიდან ყიდულობს ენერგორესურსებს. უნდა იყიდოს იქ, სადაც ყველაზე იაფია, სადაც ყველაზე მომგებიანია.
მიუბრუნდა რა კითხვას შესაძლო საფრთხეების შესახებ, თუნიანმა უპასუხა: „ენერგეტიკული რისკები წარმოიქმნება მაშინ, როდესაც თქვენი ენერგეტიკული უსაფრთხოება დაბალია და თქვენი წყარო ერთია. რაც უფრო მეტად შეძლებთ თქვენი მიწოდების წყაროების დივერსიფიკაციას, მით უფრო გაზრდით თქვენს ენერგოუსაფრთხოების დონეს“.
სომხეთი ყოველთვის ფიქრობდა ენერგეტიკული უსაფრთხოების წყაროების დივერსიფიკაციაზე. ამის დასტურად დეპუტატმა შეახსენა, რომ ერთ დროს აშენდა ირანი-სომხეთის გაზსადენიც.
თუნიანს მიაჩნია, რომ სომხეთი უნდა ეცადოს მაქსიმალურად დივერსიფიკაცია გაუწიოს შესაძლებლობებს. ამასთან, დეპუტატმა ხაზგასმით აღნიშნა. „ამ დროისთვის რუსული გაზი და ირანული გაზი სრულად აკმაყოფილებს ჩვენი ეკონომიკის მოთხოვნას.
ამდენად, დეპუტატი ირწმუნება, რომ სომხეთის დღის წესრიგში აზერბაიჯანიდან გაზის შესყიდვის საკითხი არ დგას. „ასეთ რამეზე რომ შევთანხმდეთ, ჯერ უნდა გვქონდეს მოწესრიგებული ურთიერთობები, გარკვეული კონტაქტები, პრაქტიკული ურთიერთობები და მერე ვისაუბროთ ასეთ საკითხზე, თუ ამის აუცილებლობა იქნება“, – განაცხადა მან.
მანამდე აზერბაიჯანის პრეზიდენტმა ილჰამ ალიევმა არ გამორიცხა, რომ სომხეთმა აირი აზერბაიჯანიდან შეიძინოს.
სომხეთის ეროვნული ასამბლეის თავმჯდომარემ, ალენ სიმონიანმა ჟურნალისტებთან საუბარში განაცხადა, რომ ძალიან დადებითად არის განწყობილი, ფიქრობს, რომ სომხეთმა უნდა განიხილოს ეს საკითხი, მაგრამ ასეთი განხილვები არ არის.
