მაშველები განაგრძობენ თუშეთში, ავტოავარიის შემდეგ დაკარგული ერთი ადამიანის ძებნას.
დღეს დილიდან გადაიკეტა ფშაველი-აბანო-ომალოს საავტომობილო გზა, სოფელ ლეჩურიდან ომალომდე. საგანგებო სიტუაციების მართვის სამსახურის ინფორმაციით, გზის გადაკეტვა აუცილებელია მძიმე ტექნიკის გამოყენებით ხევიდან სატვირთო ავტომანქანის ამოსატანად.
27 ივლისს მომხდარი ავტოავარიის შედეგად 6 ადამიანი დაიღუპა. გადარჩა სატვირთო ავტომანქანაში მყოფი კიდევ 5 ადამიანი, ერთი ამ დრომდე დაკარგულად ითვლება.
გამოძიების წინასწარი ვერსიით, ომალოსკენ მოძრავი „კამაზის“ მძღოლმა ვერ უზრუნველყო ავტომანქანის უსაფრთხო მართვა, გზიდან გადავიდა და ხევში გადავარდა.
