ეკონომიკა

ნავთობპროდუქტების იმპორტი საქართველოში კვლავ მცირდება

ბენზინის იმპორტი 0,5%-ით, ხოლო დიზელის საწვავის – 8%-ით შემცირდა

,,სპუტნიკი საქართველოს“ ინფორმაციით, ნავთობპროდუქტების იმპორტმა საქართველოში 2019 წლის იანვრიდან სექტემბრის ჩათვლით პერიოდში 779,4 ათასი ტონა შეადგინა, რაც 2018 წლის ამავე პერიოდთან შედარებით 4,3%-ით ნაკლებია, ნათქვამია საქართველოს ნავთობპროდუქტების იმპორტიორთა კავშირის განცხადებაში.

საწვავის ყველაზე დიდი მომწოდებელი წლის დასაწყისიდან კვლავ რუსეთია, შემდეგ მოდიან რუმინეთი, აზერბაიჯანი, თურქმენეთი, ბულგარეთი, საბერძნეთი და ა. შ.

ბენზინის იმპორტმა ცხრა თვეში შეადგინა 403,4 ათასი ტონა, ხოლო დიზელის საწვავის – 276 ათასი ტონა. ამგვარად, ბენზინის იმპორტი 0,5%-ით, ხოლო დიზელის საწვავის – 8%-ით შემცირდა.

ამის მიზეზია დიზელის საწვავის მოწოდების შემცირება, რაც, ძირითადად, თურქეთში მისი რეექსპორტის შემცირებას უკავშირდება. კიდევ ერთი მიზეზია საქართველოში ჰიბრიდული ტიპის ავტომობილების იმპორტის მნიშვნელოვანი ზრდა.

ამჟამად საქართველოში დაახლოებით 80 ათასი ჰიბრიდული ავტომობილია.

„მეორე მხრივ კი, ჩვენი ინფორმაციით გაზრდილია სატრანსპორტო საშუალებების საწვავის ავზებით აღურიცხავი დიზელის შემოდინება აზერბაიჯანის რესპუბლიკიდან ლაგოდეხისა და წითელი ხიდის გავლით და ირანის ისლამური რესპუბლიკიდან და ასევე ლარსის საბაჟო გამშვები პუნქტიდან, როდესაც ხორციელდება საქართველოში რუსეთის ფედერაციიდან ავტომობილებით ხორბლის იმპორტი”, – ნათქვამია განცხადებაში.

ნახეთ მეტი
Back to top button