საქართველოს სასტუმროებში ფასები განახევრდა – “ზოგ ხუთ ვარსკვლავიანში ნომრის ფასი 50 ლარამდეა”
დაზუსტებით შემიძლია გითხრათ, რომ საქართველოს მასშტაბით ყველა სასტუმროში ფასები თითქმის განახევრებულია, – ამის შესახებ “ინტერპრესნიუსს“ სასტუმროებისა და რესტორნების ფედერაციის დამფუძნებელმა, შალვა ალავერდაშვილმა განუცხადა.
მისი ინფორმაციით, სასტუმროები 15 ივნისიდან შიდა ტურიზმის გახსნას შემცირებული ფასებით შეხვდნენ და რიგ ხუთ ვარსკვლავიან სასტუმროებში ნომრის ფასი 50 ლარამდეა.
„დაზუსტებით შემიძლია გითხრათ, რომ საქართველოს მასშტაბით ფასები თითქმის ყველგან განახევრებულია. ერთადერთი ადგილი, სადაც ფასები გაძვირებულია, არის აბასთუმანი. ასეთი იაფი ბათუმში დასვენება, როგორც ახლაა, არასდროს ყოფილა. თანდათანობით იხსნებიან რეგიონული სასტუმროები, თუმცა წელს ძირითადი მოთხოვნა ბინებსა და კოტეჯებზე იქნება. ადამიანები უფრო დაცულად გრძნობენ აქ თავს, როცა სხვებთან შეხება არ აქვთ და ასევე, რეგულაციებისგან ნაკლებად წუხდებიან,” – აღნიშნა ალავერდაშვილმა.
რაც შეეხება გახსნილი სასტუმროების რაოდენობას, როგორც შალვა ალავერდაშვილი აცხადებს, თბილისში სასტუმროები საერთოდ არ გახსნილა და ქვეყანაში არსებული სასტუმროების მხოლოდ 15%-მდე მუშაობს.
“მცირე რაოდენობის სასტუმროებმა მიმართეს გახსნასთან დაკავშირებით. თბილისში მაგალითად არცერთ სასტუმროს არ მიუმართავს, იმიტომ, რომ ამ ეტაპზე აზრი არ აქვს თბილისში სასტუმროს გახსნას. ვის მოემსახურონ, ჭიათურას თუ წყალტუბოს? ამ ეტაპისთვის საქართველოში სასტუმროების 15%-ზე მეტი არ გახსნილა. გახსნა მოთხოვნაზეა დამოკიდებული,” – აღნიშნა მან.
