,,News.am“ წერს, რომ ლევადას ცენტრმა გაარკვია რუსების დამოკიდებულება უცხო ქვეყნების მიმართ. სოციოლოგიურმა სამსახურმა ჩაატარა გამოკითხვა, რომლის დროსაც რესპონდენტებს სთხოვეს დაესახელებინათ ის ქვეყნები, რომლებიც მათი აზრით რუსეთის მიმართ მეგობრული ან მტრულია. 20-26 აგვისტოს ჩატარებულ გამოკითხვაში 50 რეგიონის 137 დასახლების მაცხოვრებელმა მიიღო მონაწილეობა. 1601 რესპონდენტთა შორის არიან ქალაქების და სოფლების წარმომადგენლები.
ბელორუსია (58%), ჩინეთი (40%), ყაზახეთი (35%), სომხეთი (17%) და აზერბაიჯანი (15%) იმ ხუთეულში არიან, რომლებსაც რუსები რუსეთის მეგობრებად და მოკავშირეებად თვლიან. მას მოსდევს ინდოეთი (13%), სირია (12%) და ვენესუელა (11%).
ვენესუელას მოსდევს გერმანია (10%) და ყირგიზეთი კუბით (თითოეული 9%). სიის ბოლოშია რუსეთის ნაკლებად მეგობარი ქვეყნები, როგორიცაა: პოლონეთი, თურქმენეთი, ფინეთი, საფრანგეთი და ჩეხეთი, რომლებმაც თითოეულმა მიიღო 2-2%.
რუსეთის მიმართ ყველაზე არამეგობრული და მტრული ქვეყნების ტოპ 5 სიაშია: შეერთებული შტატები (60%), უკრაინა (35%), დიდი ბრიტანეთი (29%), ლატვია, ლიტვა და პოლონეთი (თითოეულის 26%). პოლონეთს მოსდევს საქართველო (16%), გერმანია (15%) და ესტონეთი (11%).
რესპონდენტების აზრით, ავსტრალია, ბულგარეთი, ნიდერლანდები, იტალია, პაკისტანი, რუმინეთი, საუდის არაბეთი, ჩრდილოეთ კორეა, აზერბაიჯანი, სომხეთი, ბელორუსია, ვიეტნამი, ჩეხეთი და უნგრეთი ნაკლებად მტრულად არიან განწყობილი რუსეთის მიმართ. გამოკითხულთა 2% ამ ქვეყნებს არამეგობრულად თვლის.
უნდა აღინიშნოს, რომ 2019 წელს გამოკითხულთა 22% სომხეთს მეგობარ და მოკავშირე ქვეყნად თვლიდა.
