სომხეთის პრემიერ-მინისტრმა ნიკოლ ფაშინიანმა განაცხადა, რომ იგი შეუთანხმდა რუსეთის პრეზიდენტს ვლადიმერ პუტინს “Sputnik V” რუსული ვაქცინის მოწოდებაზე.
”სომხეთში შემოიტანეს პირველი პარტია – 15 ათასი დოზა, მაგრამ ჩვენ დაახლოებით მილიონები გვჭირდება. ”ჩვენ შევთანხმდით რუსეთის პრეზიდენტთან, რომ სომხეთი მიიღებს მას”, – აღნიშნა ფაშინიანმა ტელეკომპანია ”როსია 1” -თან ინტერვიუში.
მან აღნიშნა, რომ დღეს მსოფლიოში რუსული ვაქცინის ავტორიტეტი იზრდება და სომხეთშიც მას დიდი ნდობით ეპყრობიან.
აღსანიშნავია, რომ რუსული ვაქცინის Sputnik V პირველი პარტია 15000 დოზით სომხეთში 8 აპრილს შემოვიდა.
სომხეთის ჯანდაცვის სამინისტრომ ,,ინტერფაქსს“ განუცხადა, რომ Sputnik V ვაქცინამ ოფიციალური გამოყენების ნებართვა მიიღო 1 თებერვალს.
“როსია 1” -ის ეთერში, ფაშინიანმა ასევე ისაუბრა 7 აპრილს რუსეთის პრეზიდენტთან შეხვედრის შესახებ და იგი ეფექტურად შეაფასა.
”ჩვენ გვქონდა ძალზე გაჯერებული დღის წესრიგი, ეფექტურად განვიხილეთ ორმხრივი ურთიერთობების ყველა საკითხი, მათ შორის რეგიონული, უსაფრთხოების და ეკონომიკური საკითხები. ბევრი საკითხი დაკავშირებულია მთიან ყარაბაღში არსებულ ვითარებასთან. დიახ, მე ძალიან კმაყოფილი ვარ”, – აღნიშნა ფაშინიანმა.
მანამდე, მოსკოვის სომეხ იურისტთა ასოციაციის წარმომადგენლებთან შეხვედრისას, ფაშინიანმა განაცხადა, რომ დამყარდა ძალიან ღია ურთიერთობები რუსეთის პრეზიდენტთან, რაც, მისი თქმით, უფრო პირდაპირი გახდა, განსაკუთრებით ბოლო თვეების განმავლობაში. სომხეთის მთავრობის მეთაურმა ხაზი გაუსვა, რომ ”სომხეთ-რუსეთის ურთიერთობების ხასიათი სტრატეგიულია” და არსებული გამოწვევებისა და არსებული ვითარების პირობებში, ეს ურთიერთობები უფრო სიღრმისეული უნდა იყოს.
