სომხეთის საგარეო საქმეთა მინისტრმა არა აივაზიანმა ეუთოს უსაფრთხოების თანამშრომლობის ფორუმზე სიტყვით გამოსვლისას განაცხადა, რომ აზერბაიჯანი არა მხოლოდ ამართლებს ძალის გამოყენებას, არამედ აცხადებს, რომ მან ყარაბაღის კონფლიქტი ძალის გამოყენებით მოაგვარა და ადგილზე შექმნა ახალი რეალობები. ინფორმაციას ავრცელებს სომხეთის საგარეო საქმეთა სამინისტროს პრესსამსახური.
”ძალის გამოყენებით შექმნილი რეალობები არ შეიძლება იყოს ლეგალური, რადგან ისინი თითოეულ კონფლიქტურ და კრიზისულ ვითარებაში ქმნიან ხელსაყრელ გარემოს ომისთვის. მხოლოდ ის ფაქტი, რომ ძალის გამოყენება მოხდა ეუთოს მიერ განხილული კონფლიქტის ფარგლებში, ნათლად აჩვენებს, რომ ორგანიზაციამ ვერ შეძლო დაეცვა თავისი ძირითადი ღირებულებები, პრინციპები და ვალდებულებები”, – აღნიშნა აივაზიანმა.
მისივე თქმით, ეჭვქვეშ დადგა ეუთოს, როგორც გაეროს ქარტიის VIII თავით განსაზღვრული რეგიონალური მექანიზმის და როგორც რეგიონში არსებული დავების მშვიდობიანი მოგვარების ძირითადი ორგანიზაციის შესატყვისობა.
”იმ სიტუაციაში, როდესაც ეუთოს ვალდებულებების უმეტესობა, განსაკუთრებით სამხედრო-პოლიტიკურ სფეროსთან დაკავშირებული, არ სრულდება, ჩვენ უნდა გადავაფასოთ აღმასრულებელი სტრუქტურების როლი, რომლებიც თავდაპირველად ჩამოყალიბდნენ წევრ სახელმწიფოების დასახმარებლად ამ ვალდებულებების შესრულების საქმეში”- აღნიშნა საგარეო საქმეთა მინისტრმა.
აივაზიანის თქმით, ეუთოს ტერიტორიაზე არსებული უსაფრთხოების გარემო მოითხოვს ერთობლივ ძალისხმევას, ერთგულებას და პოლიტიკურ ნებას, რომ შეინარჩუნოს ეუთოს ყოვლისმომცველი, განუყოფელი და პარტნიორული უსაფრთხოების კონცეფცია.
უნდა აღინიშნოს, რომ სომხეთმა მიიღო ეუთოს უსაფრთხოების თანამშრომლობის ფორუმის (ეუთო) თავმჯდომარეობა. სომხეთის თავმჯდომარეობის პროგრამა გამომდინარეობს ეუთო – ს პრინციპების და ვალდებულებების დაცვის გადაუდებელი აუცილებლობით ეუთოს უსაფრთხოების გარემოს შემდგომი დაშლის თავიდან ასაცილებლად.
