საქართველოს კულტურის მინისტრმა და ვიცე-პრემიერმა თეა წულუკიანმა განაცხადა, რომ საჭიროების შემთხვევაში, ყოფილ პრეზიდენტ მიხეილ სააკაშვილს ციხის კლინიკიდან კლინიკაში გადაიყვანენ.
„შიმშილი ზიანს აყენებს ჯანმრთელობას, ამიტომ პროტესტის ამ ფორმას არ მივესალმები. შეშფოთების საფუძველი არ არის, შეგიძლიათ მშვიდად იყოთ, რადგან როგორც კი გაჩნდება სამოქალაქო კლინიკაში გადაყვანის საჭიროება, რა თქმა უნდა, როგორც ყოველთვის აკეთებდა სასჯელაღსრულების სამსახური, ამ შემთხვევაშიც გაკეთდება“, – განაცხადა წულუკიანმა.
უფრო მეტიც, ვიცე-პრემიერმა აღნიშნა, რომ ამ ეტაპზე ასეთი საჭიროება არ არსებობს.
სააკაშვილის ციხის კლინიკაში გადაყვანის მიზეზი გახდა სახელმწიფო უსაფრთხოების სამსახურის განცხადება მთავარი ოპოზიციური პარტიის ,,ერთიანი ნაციონალური მოძრაობის“ მიერ მოსალოდნელი არეულობის შესახებ. სახელმწიფო უსაფრთხოების სამსახურმა პირდაპირ განაცხადა, რომ ყოფილი პრეზიდენტის მხარდამჭერებმა შესაძლოა სცადონ კლინიკაზე თავდასხმა მისი გათავისუფლების მიზნით. სახელმწიფო უსაფრთხოების სამსახური ქვეყანაში გადატრიალების მცდელობას იძიებს.
„ნაციონალური მოძრაობა“ და მისი მხარდამჭერები ყოველდღიურად აწყობენ საპროტესტო აქციებს სააკაშვილის მრავალპროფილიან სამოქალაქო კლინიკაში გადაყვანის მოთხოვნით. საქართველოს პარლამენტის ათმა დეპუტატმა, ასევე ფოთის, ზუგდიდისა და რუსთავის საკრებულოს ზოგიერთმა დეპუტატმა იგივე მოთხოვნით შიმშილობა გამოაცხადა.
სააკაშვილმა შიმშილობა დაკავების დღეს, 1 ოქტომბერს დაიწყო. როდესაც ყოფილმა პრეზიდენტმა მედიკამენტების მიღება შეწყვიტა, ჯანმრთელობის გაუარესების თავიდან ასაცილებლად რუსთავის მე-12 საპყრობილიდან თბილისის მე-18 ციხის საავადმყოფოში გადაიყვანეს. თავად სააკაშვილი, მისი ადვოკატები და პირადი ექიმი დაჟინებით მოითხოვდნენ მის გადაყვანას მრავალპროფილიან სამოქალაქო კლინიკაში.
