უკრაინაში დაღუპულ ქართველ მებრძოლებს საქართველოში ხუთშაბათს გადმოასვენებენ
საქართველოს ორ მოქალაქეს გიორგი ბერიაშვილის და დავით რატიანს, რომლებიც რუსეთ-უკრაინის ომში იბრძოდნენ და საარტილერიო დარტყმებისას დაიღუპნენ, სამშობლოში ხუთშაბათს გადმოასვენებენ. ამის შესახებ „ქრონიკა“-სთან საუბარში აღნიშნა საქართველოს ელჩმა უკრაინაში.
„გუშინწინ მათი ცხედრები კიევიდან გადმოასვენეს და გუშინ მანქანა ლვოვში ჩამოვიდა, დღეს უკვე პოლონეთის მიმართულებით გაემართა. სავარაუდოდ, თუ რაიმე ფორს-მაჟორმა არ შეუშალა ხელი, დღის ბოლოს ვარშავაში იქნება და ხვალ საღამოს, ვარშავა-თბილისის რეისით გარდაცვლილებს გადმოასვენებენ საქართველოში“, – განაცხადა გიორგი ზაქარაშვილმა.
ამასთან, მიმდინარეობს მოლაპარაკებები საქართველოს 2 მოქალაქის გადმოსვენებაზე, რომლებიც საბრძოლო მოქმედებებში არ იღებდნენ მონაწილეობას. ასევე მარიუპოლში დაიღუპა ერთი ქართველი, რომელიც უკრაინის მოქალაქეა, თუმცა ქალაქში არსებული ვითარებიდან გამომდინარე, მას, სავარაუდოდ მარიუპოლშივე დაკრძალავენ.
