სომხეთის რესპუბლიკა უმაღლეს დონეზე უარყოფს ინფორმაციას იმის შესახებ, რომ სომხეთის ტერიტორიით უკრაინაში დაქირავებული ტერორისტების გადაყვანა ხდება. სომხეთის პრემიერ-მინისტრი ნიკოლ ფაშინიანი ყალბი ინფორმაციის საკითხს 31 მარტს მთავრობის სხდომაზე შეეხო.
„ყალბ ცნობას აწოდებენ იმის შესახებ, რომ სომხეთის ტერიტორიით უკრაინაში დაქირავებულები გადაჰყავთ. ყველამ, ვინც მეტ-ნაკლებად იცის, რომ სომხეთი, რომელიც ორი წლის წინ დაზარალდა ომით სადაც მოწინააღმდეგე მხარე დაქირავებულ ჯარისკაცებს იყენებდა, არასოდეს შეუწყობს ხელს იმ ძალებს, რომლებიც ცდილობენ დაქირავებულების გამოყენებას“, – განაცხადა ნიკოლ ფაშინიანმა. ამის შესახებ იტყობინება Armenpress-ი .
მისი თქმით, ასეთი fake news-ები ხანდახან მნიშვნელოვან როლს თამაშობენ იმ კონტექსტში, რომ აზერბაიჯანი, როგორც 2020 წლის 44-დღიან ომამდე, ისე მის შემდეგაც, ახორციელებს დისკურსის და შინაარსის ფორმირების პოლიტიკას, რომელითაც ცდილობს მთიან ყარაბაღსა და სომხეთის რესპუბლიკაზე ფართომასშტაბიანი თავდასხმის ლეგიტიმაციას.
