,,ნეტგაზეთი.გე” წერს, რომ მომღერალი და ენმ-ის სიით პარლამენტის წევრი ბუბა კიკაბიძე „ქართული ოცნების“ დამფუძნებელ ბიძინა ივანიშვილს მიხეილ სააკაშვილის საავადმყოფოში გადაყვანის თხოვნით მიმართავს. კიკაბიძემ ივანიშვილს „სხვა ნანუკას შოუში“ მიმართა.
მომღერლის თქმით, ხელისუფლების წარმომადგენლებთან საუბარს აზრი არ აქვს, რადგან გადაწყვეტილების მიმღები ბიძინა ივანიშვილია და მას ამიტომ მიმართავს.
როგორც კიკაბიძე ამბობს, მიხეილ სააკაშვილს რომ რაიმე დაემართოს, ამას ერი რამდენიმე საუკუნე ვერ ჩამოირეცხავს.
“მინდა, ბიძინას ვუთხრა, არ ვიცი, სად არის, გამოუშვას მიშა სააკაშვილი იმიტომ, რომ მიზანმიმართულად კლავენ. თუ გამოუშვებს, მაგის შვილიშვილებს ეტყვიან მადლობას მერე. ეს არის ჩემი თხოვნა, “ბაკლანებთან“ ლაპარაკს არ აქვს აზრი იმიტომ, რომ მაგათი დირექტორია ერთი კაცი – ბიძინა ივანიშვილი. ეგ არის. თუ ჩააკვდათ ხელში, საქართველოში დედა შვილს არ აიყვანს.
ჩვენი სირცხვილი იქნება, რამე რომ მოხდეს. ამას ერი ვერ ჩამოირეცხავს რამდენიმე საუკუნე, ისტორიაში შევა ეს ამბავი. ძლივს გაგვიჩნდა ნამდვილი პოლიტიკოსი, ერთი. საავადმყოფოში რომ გადაიყვანონ და ცოტა გამოაცოცხლონ, არაფერი არ უნდა იმ კაცს, ნუ ეშინიათ. ამათ ეშინიათ მაგისი გაშვება“, – განაცხადა კიკაბიძემ.
სახალხო დამცველთან შექმნილი სამედიცინო ექსპერტთა ჯგუფის დასკვნით, მიხეილ სააკაშვილს პოსტტრავმული სტრესული აშლილობის შედეგად ანორექსია და ცილოვანი შიმშილი განუვითარდა და ამ ეტაპზე რეკომენდებულია დროული კომპლექსური ნეირო-ფსიქოლოგიური და ფიზიკური რეაბილიტაცია.
მიხეილ სააკაშვილის ოჯახი საქართველოს მთავრობას მის საზღვარგარეთ სამკურნალოდ გადაეყვანას სთხოვს.
ოჯახი სთავაზობს ხელისუფლებას, თუ ქართველ ექიმებს არ ენდობა, სასწრაფოდ ჩამოიყვანოს საერთაშორისო კვალიფიკაციის სპეციალისტები მიხეილ სააკაშვილის ჯანმრთელობის მდგომაროების შესაფასებლად.
