2024 წლიდან სრ ყველა მოქალაქემ უნდა შეავსოს დეკლარაცია შემოსავლის შესახებ. ფაშინიანმა ყურადღება გაამახვილა პოლიტიკურ გადაწყვეტილებაზე
სრ პრემიერ-მინისტრმა ნიკოლ ფაშინიანმა ხაზი გაუსვა მმართველი პოლიტიკური ძალის პოლიტიკურ გადაწყვეტილებას ფიზიკური პირების შემოსავლების საყოველთაო დეკლარაციის სისტემის დანერგვის საკითხში.
„არმენპრესის“ ცნობით, საკითხს ნიკოლ ფაშინიანი შეეხო პარლამენტის მუდმივმოქმედი კომიტეტების გაერთიანებულ სხდომაზე „სომხეთის რესპუბლიკის 2021 წლის სახელმწიფო ბიუჯეტის შესრულების შესახებ“ წლიური ანგარიშის განხილვაზე სიტყვით გამოსვლისას.
„მინდა ხაზი გავუსვა ჩვენს პოლიტიკურ გადაწყვეტილებას, შემოვიღოთ საყოველთაო დეკლარაციის სისტემა. ანუ სომხეთის ყველა მოქალაქემ უნდა განაცხადოს თავისი შემოსავალი, რომელიც 2024 წლიდან 2023 წლის შემოსავლებისთვის ამოქმედდება“, – განაცხადა ფაშინიანმა.
პრემიერის თქმით, მას აქვს ძალიან დიდი მნიშვნელობა ეკონომიკის, პოლიტიკის და ცივილიზაციის მხრივ.
