აზერბაიჯანმა რკინიგზის მშენებლობის დაწყების შეთანხმებაზე უარი თქვა.ამის შესახებ აღნიშნა ნიკოლ ფაშინიანმა პრესკონფერენციაზე კომუნიკაციების განბლოკვის საკითხზე საუბრისას.
„ბრიუსელში აზერბაიჯანის პრეზიდენტთან ერთად განვაცხადეთ, რომ მიღწეულია შეთანხმება, რომ რკინიგზის მშენებლობა უნდა დაიწყოს. თუმცა, აზერბაიჯანმა, ფაქტობრივად, უარი თქვა ამ შეთანხმებაზე. ამის შემდეგ გაკეთდა წინადადება მიღწეული შეთანხმებების წერილობით დოკუმენტში აღრიცხვის შესახებ, რომლის პროექტი სამმხრივი სამუშაო ჯგუფის რუსმა თანათავმჯდომარემ ალექსეი ოვერჩუკმა წარადგინა. სომხურმა მხარემ გამოთქვა მზადყოფნა, ხელი მოაწეროს მას, მაგრამ აზერბაიჯანულმა მხარემ უარი თქვა“, – განაცხადა ფაშინიანმა.
მისი თქმით, აზერბაიჯანულმა მხარემ ასევე უარყო სომხური მხარის შეთავაზებული პაკეტური ვერსია გზებისა და რკინიგზის გახსნაზე.
პრემიერ-მინისტრმა შეახსენა, რომ მანამდეც განაცხადა, რომ სომხეთისთვის მიუღებელია აზერბაიჯანის პრეზიდენტის ილჰამ ალიევის განცხადება, რომ სომხეთზე გამავალმა გზებმა ისეთივე ლოგიკით უნდა იმუშაოს, როგორიც ლაჩინის დერეფანი მუშაობს. „სამმხრივ განცხადებაში ერთი დერეფანია ნახსენები – ეს არის ლაჩინის დერეფანი, რომელიც რუსი სამშვიდობოების კონტროლის ქვეშაა. საქმე ის არის, რომ აზერბაიჯანის დასავლეთ რეგიონებს უნდა ჰქონდეთ შესაძლებლობა დაამყარონ სატრანსპორტო კავშირები ნახჭევანთან“, – განაცხადა ფაშინიანმა.
მან დასძინა, რომ აზერბაიჯანის რიტორიკა დიდი პრობლემაა. საერთაშორისო თანამეგობრობა აცხადებს, რომ სომხეთი ყოველთვის ცდილობს იყოს მაქსიმალურად კონსტრუქციული, მაგრამ საპასუხოდ ვხედავთ აზერბაიჯანის მუდმივად აგრესიულ რიტორიკას.
ფაშინიანმა ილაპარაკა კომუნიკაციებთან დაკავშირებით არსებულ მთავარ უთანხმოებაზე. მისი თქმით, საგზაო სარგებლობის საზღვრების გადაკვეთის სამართლებრივ პროცედურებზე ჯერ ბოლომდე ვერ შეთანხმდნენ. პრემიერ-მინისტრმა დასძინა, რომ პრაქტიკაში 3-4 ვარიანტია და მათგან ერთი უნდა იქნეს არჩეული.
