სომხეთის პრემიერ-მინისტრი ნიკოლ ფაშინიანი უარს იტყვის სამშვიდობო შეთანხმების ხელმოწერაზე, თუ ეს ტექსტი არ შეესაბამება სრ სახელმწიფო ინტერესებს. ამის შესახებ მან პრესკონფერენციაზე განაცხადა. https://armenpress.am/arm/news/1101340.html? პრემიერ-მინისტრმა კიდევ ერთხელ განაცხადა, რომ სომხეთი მზადაა ხელი მოაწეროს სამშვიდობო დოკუმენტს, თუ ის შეესაბამება სომხეთის ინტერესებს.
„თუ მაგიდაზე დაიდება დოკუმენტი, რომლის ხელმოწერასაც ვაპირებთ, ეს ცუდი კი არა, არამედ კარგი ამბავი იქნება, რადგან ეს ნიშნავს, რომ საბოლოოდ მივაღწიეთ იმ წერტილს, სადაც მივიჩნევთ, რომ სომხეთის რესპუბლიკის ინტერესები დაცულია. ახლა პრობლემა მხოლოდ დოკუმენტის შინაარსი კი არა, ამ შინაარსის განხორციელების მექანიზმია. ჩვენ გვაქვს 9 ნოემბერს ხელმოწერილი დოკუმენტი, მაგრამ ფაქტია, რომ ის დღეს არ ხორციელდება“, – განაცხადა ფაშინიანმა.
მან შენიშნა, რომ შეთანხმების გაფორმება შესაძლებელია, მაგრამ თუ არ არსებობს მისი დებულებების განხორციელების მექანიზმები, მაშინ ხელმოწერისთანავე შეიძლება მოხდეს ახალი სამხედრო ესკალაცია.
„ტექსტი არ იქნება სრულყოფილი, მოდით ყველამ თავიდანვე გავიგოთ, მაგრამ ის შეიძლება შეესაბამებოდეს სომხეთის რესპუბლიკის დაბალანსებულ ინტერესებს. მაგრამ თუ არ იქნება ამ დოკუმენტის გამოყენებისა და განხორციელების მექანიზმები, შეგვიძლია ხელი მოვაწეროთ დოკუმენტს სახელწოდებით „სამშვიდობო შეთანხმება“ და ერთი კვირის შემდეგ მივიღოთ ახალი ომი ან ახალი ესკალაცია“, – განაცხადა სომხეთის პრემიერ-მინისტრმა.
