რუსეთი თეირანთან და ბაქოსთან აზერბაიჯანის ტერიტორიის გავლით სომხეთში, შემდეგ კი ირანში ელექტროენერგიის მიწოდების შესაძლებლობას განიხილავს

რუსეთის ენერგეტიკის მინისტრმა ნიკოლაი შულგინოვმა განაცხადა, რომ კრემლი მოლაპარაკებებს აწარმოებს თეირანთან და ბაქოსთან არსებული ინფრასტრუქტურის გამოყენებით აზერბაიჯანის გავლით 300 მეგავატი ელექტროენერგიის ექსპორტის შესაძლებლობაზე სომხეთში, მოგვიანებით კი ირანში, წერს  სააგენტო „პრაიმი“.

„ახლა ჩვენ უბრალოდ ვუყურებთ აზერბაიჯანის ტერიტორიის გავლით ელექტროენერგიის მიწოდებას სომხეთში, იქიდან ირანში და, შესაძლოა, სხვა ქვეყნებშიც. პირველ ეტაპზე ვთანხმდებით თეირანთან და ბაქოსთან, რომ არსებული ინფრასტრუქტურა გამოიყენონ ახალი მშენებლობის გარეშე“, – აღნიშნა შულგინოვმა.

მან დასძინა, რომ მოლაპარაკების ყველა მხარე დაინტერესებულია ამ პროექტით.

მანამდე რუსეთის ენერგეტიკის მინისტრმა და ყაზახეთის ენერგეტიკის სამინისტროს ხელმძღვანელმა ალმასადამ სატკალიევმა ხელი მოაწერეს შეთანხმებას ნავთობის ტრანზიტის მოცულობის გაზრდაზე 2033 წლის ბოლომდე წელიწადში 10 მილიონ ტონამდე.

მხარეებმა ასევე ისაუბრეს ელექტროენერგიის სფეროში თანამშრომლობაზე. მოსკოვი მზადაა განახორციელოს ერთობლივი პროექტები ენერგეტიკული ობიექტების მშენებლობისა და მოდერნიზაციის, აღჭურვილობის წარმოებისა და მიწოდების სფეროებში.