სომხეთის უშიშროების საბჭოს მდივნის, არმენ გრიგორიანის ვიზიტი ირანში საბაბი გახდა ისლამური რესპუბლიკისთვის გამოეხატა თავისი აზრი კავკასიის რეგიონში კონფლიქტების რეგიონული პოტენციალის მეშვეობით გადაწყვეტის შესახებ. ამის შესახებ ირანის საგარეო საქმეთა სამინისტროს ოფიციალურმა წარმომადგენელმა ნასერ ქანაანმა განაცხადა, იუწყება IRNA.
მისი თქმით, ვიზიტი შედგა ორ მეზობელ ქვეყანას შორის მოლაპარაკებებისა და კონტაქტების გაგრძელების ფარგლებში, რათა განიხილონ ორმხრივი ურთიერთობები და კავკასიის რეგიონში განვითარებული მოვლენები.
მისი თქმით, ირანი დიდ მნიშვნელობას ანიჭებს კავკასიაში არსებულ ვითარებას და ამ საკითხების განსახილველად შედგა სომეხი ჩინოვნიკის ვიზიტი ირანში. მან აღნიშნა, რომ თეირანი მიესალმება ბაქოსა და ერევანს შორის კონფლიქტების შეწყვეტას და ხაზგასმით აღნიშნა, რომ ირანი ეწინააღმდეგება საერთაშორისო და გეოპოლიტიკური საზღვრების ნებისმიერ ცვლილებას.
ირანის საგარეო საქმეთა მინისტრის ჰოსეინ ამირაბდოლაჰიანის ზანგეზურის დერეფანზე ბოლო განცხადებებთან დაკავშირებით მან თქვა, რომ ისლამური რესპუბლიკა მოწოდებულია განავითაროს სატრანსპორტო ქსელები, რაც სარგებელს მოუტანს რეგიონის ყველა ქვეყანას, მაგრამ ეწინააღმდეგება საერთაშორისო საზღვრების შეცვლას და ექსტრარეგიონულ ჩარევას.
„ირანის პოზიცია რეგიონის საზღვრებთან დაკავშირებით საკმაოდ ნათელია. ჩვენ არაერთხელ გამოვთქვით ჩვენი აზრი. ჩვენ გვჯერა, რომ ყველა მხარის პასუხისმგებელი ძალისხმევით უნდა გადაწყდეს დავები პოლიტიკურად და მშვიდობიანად მოლაპარაკებების გზით“, – განაცხადა მან და დასძინა, რომ ირანი მზად არის ყველაფერი გააკეთოს კავკასიაში არსებული პრობლემების მოსაგვარებლად.
მისი თქმით, აზერბაიჯანის ოფიციალური წარმომადგენელი ირანში ვიზიტს აპირებს, ვიზიტის ზუსტი თარიღი თავის დროზე გახდება ცნობილი. მან ასევე განაცხადა, რომ დაგეგმილი ვიზიტის გარდა, ამჟამად მიმდინარეობს ორმხრივი დისკუსიები რიგ საკითხებზე და აღნიშნა, რომ მათ შორის მთავარია თეირანში აზერბაიჯანის საელჩოს მუშაობის განახლება და კავკასიის რეგიონში მოვლენების განვითარება.
