აზერბაიჯანის მცდელობა მუდმივად შეცვალოს სომხეთთან მოლაპარაკების ფორმატი, სომხურ მხარეს უჩენს ეჭვს, არის თუ არა ბაქო დაინტერესებული სამშვიდობო პროცესის დასრულებით.
ამის შესახებ სომხეთის საგარეო საქმეთა მინისტრის მოადგილემ ვაჰან კოსტანიანმა ეროვნულ ასამბლეაში ჟურნალისტებთან საუბარში განაცხადა.
„ფაქტობრივად, ფორმატების მუდმივი ცვლილება ჩვენში სერიოზულ ეჭვებს ბადებს, არის თუ არა ოფიციალური ბაქო დაინტერესებული სამშვიდობო პროცესის დასრულებით, თუ ისინი უბრალოდ ცდილობენ ერთი ფორმატიდან მეორეზე გადასვლას და ამით ერიდებიან კონკრეტული შეთანხმებების მიღწევას“, – განაცხადა კოსტანიანმა.
თბილისში შეხვედრის გამართვის საკითხთან დაკავშირებით, მინისტრის მოადგილემ აღნიშნა, რომ მსგავსი შეთანხმება ამ დროისთვის არ არსებობს.
სომხური მხარე მზადაა ოქტომბერში ბრიუსელში დაგეგმილ ბოლო შეხვედრაში მიიღოს მონაწილეობა.
კოსტანიანის თქმით, სომხეთს მეზობლებთან ურთიერთობის დარეგულირება სურს. ხოლო კითხვაზე, დასავლურ თუ რუსულ პლატფორმებზე, კოსტანიანმა უპასუხა, რომ პლატფორმა თვითმიზანი არ შეიძლება იყოს.
„ჩვენთვის მნიშვნელოვანია, რომ ჩვენ შეგვიძლია ურთიერთობების დარეგულირება. ამ მოგვარების შემდეგ, მიღწეულ და წერილობით დაფიქსირებულ შეთანხმებებს პატივი უნდა სცენ და პარტნიორებმა უნდა უზრუნველყონ, რომ აზერბაიჯანული მხარე მათ არ დაარღვევს“, – განაცხადა მან.
ევროპის საბჭოს პრეზიდენტმა ჩარლზ მიშელმა თვის დასაწყისში გრანადაში გამოაცხადა, რომ მან ოქტომბრის ბოლოს მიიწვია სომხეთისა და აზერბაიჯანის ლიდერები ბრიუსელში და ორივე ლიდერი დათანხმდა ამ შეხვედრაზე წასვლას.
5 ოქტომბერს შარლ მიშელს, ასევე საფრანგეთისა და გერმანიის ლიდერებს ემანუელ მაკრონსა და ოლაფ შოლცს გრანადაში პრემიერ-მინისტრ ნიკოლ ფაშინიანთან შეხვედრა ჰქონდათ. აზერბაიჯანის პრეზიდენტმა ილჰამ ალიევმა უარი თქვა ამ მოლაპარაკებებში მონაწილეობაზე.
