ევროკავშირის საგარეო საქმეთა მინისტრების საბჭოს სხდომა დილიდან დაიწყო, რომელსაც ევროკავშირის უმაღლესი წარმომადგენელი საგარეო საქმეთა და უსაფრთხოების საკითხებში, ჟოზეპ ბორელი თავმჯდომარეობდა. საბჭოს სხდომის ფარგლებში გაიმართა არაფორმალური საუზმე, რომელშიც სომხეთის საგარეო საქმეთა სამინისტროს ხელმძღვანელი არარატ მირზოიანიც მონაწილეობდა.
„ეს კარგი შესაძლებლობაა წარმოგიდგინოთ, როგორია დღეს სომხეთი, რა გამოწვევები და ასევე შესაძლებლობები, მისწრაფებები გვაქვს. ეს არის კარგი შესაძლებლობა წარმოვადგინოთ ჩვენი ხედვა ევროკავშირთან ურთიერთობის გაღრმავების შესახებ, ვისაუბროთ იმაზე, რაც აქამდე გაკეთდა სომხეთსა და ევროკავშირს შორის. ეს ასევე კარგი შესაძლებლობაა გამოვხატოთ ჩვენი მადლიერება ევროკავშირისადმი ჩვენი დემოკრატიული რეფორმების, მთიანი ყარაბაღიდან ლტოლვილების, სამხრეთ კავკასიის სამშვიდობო პროცესის მხარდაჭერისთვის“, – განაცხადა სომხეთის საგარეო საქმეთა მინისტრმა არაფორმალურ შეხვედრაზე დასწრებამდე გამართულ პრესკონფერენციაზე.
ბრიუსელში „არმენპრესის“ კორესპონდენტის ცნობით, ევროკავშირის საგარეო საქმეთა მინისტრების საბჭოს სხდომა უკრაინის საგარეო საქმეთა მინისტრთან დიმიტრი კულებასთან აზრთა არაფორმალური გაცვლით დაიწყება. სესიის დღის წესრიგში რუსეთის აგრესია უკრაინის წინააღმდეგ, სიტუაცია ისრაელსა და რეგიონში და სხვა საკითხებია. საღამოს მინისტრი არარატ მირზოიანი მონაწილეობას მიიღებს ევროკავშირის აღმოსავლეთ პარტნიორობის საგარეო საქმეთა მინისტრების დონეზე გამართულ შეხვედრაში. მინისტრები აღმოსავლეთ პარტნიორობის და მისი მიღწევების შესახებ მოსაზრებებს გაცვლიან. ასევე განხილული იქნება, თუ როგორ შეუძლია EaP-მა გააგრძელოს წევრი ქვეყნებისა და პარტნიორი ქვეყნების საჭიროებების დაკმაყოფილება, რაც 2024 წლის ერთობლივი მუშაობის მთავარი პრიორიტეტები უნდა იყოს და როგორ დააჩქაროს აღმოსავლეთ პარტნიორობის ეკონომიკური და საინვესტიციო გეგმის განხორციელება. ასევე განიხილება ისეთ რეგიონებთან, როგორიცაა ცენტრალური აზია და დასავლეთ ბალკანეთი თანამშრომლობის გაზრდის ხერხები და გზები, ასევე სხვა რეგიონულ პოლიტიკასთან, როგორიცაა შავი ზღვის სინერგია.
