სომხეთის რესპუბლიკას არ აქვს პრეტენზია სხვა ტერიტორიაზე, გარდა მისი სუვერენული ტერიტორიისა და არავის არ უნდა ჰქონდეს პრეტენზია სომხეთის რესპუბლიკის რომელიმე ტერიტორიაზე.
ამის შესახებ 28 იანვარს სომხეთის რესპუბლიკის არმიის 32 წლისთავისადმი მიძღვნილ სადღესასწაულო ღონისძიებაზე განაცხადა სრ პრემიერ-მინისტრმა ნიკოლ ფაშინიანმა.
„როგორც ვთქვი, ჩვენ მზად ვართ მივცეთ ასეთი გარანტიები, გრძელვადიანი და შეუქცევადი გარანტიები, მაგრამ მსგავს გარანტიებს ველოდებით სხვებისგან.
ჩვენ მზად ვართ ამ გზით წავიდეთ და გარდა ამისა, აზერბაიჯანს უსაფრთხოების გარანტიების რამდენიმე მექანიზმი შევთავაზეთ. მაგალითად, ჯარების სარკისებური გაყვანა სომხეთის სსრ და აზერბაიჯანის სსრ ადმინისტრაციულ საზღვარზე. ეს საზღვარი გახდა სახელმწიფო საზღვარი 1991 წლის ალმა-ატას დეკლარაციის თანახმად და სომხეთი და აზერბაიჯანი 2022 წლის 6 ოქტომბერს პრაღაში შეთანხმდნენ, რომ ამის საფუძველზე აღიარებენ ერთმანეთის ტერიტორიულ მთლიანობას. ჯარების სარკისებური გაყვანა შესაძლებელს გახდის, რომ აზერბაიჯანის სსრ-ის ყველა ტერიტორია იყოს აზერბაიჯანის, ხოლო სომხეთის სსრ-ის ყველა ტერიტორია სომხეთის კონტროლის ქვეშ“, – განაცხადა სომხეთის პრემიერ-მინისტრმა.
მისი თქმით, სომხეთმაც შესთავაზა საზღვრის დემილიტარიზაცია, ანუ დემილიტარიზაცია შესთავაზა აზერბაიჯანს. „ასევე, შეიარაღების კონტროლის ორმხრივი მექანიზმი, ასევე თავდაუსხმელობის პაქტის ხელმოწერა, თუ აღმოჩნდება, რომ სამშვიდობო ხელშეკრულების ხელმოწერას მოსალოდნელზე მეტი დრო დასჭირდება“, – ხაზგასმით აღნიშნა ნიკოლ ფაშინიანმა და დასძინა, რომ სომხეთის რესპუბლიკა მშვიდობის დღის წესრიგის ერთგული რჩება და არ გადაუხვევს ამ დღის წესრიგს.
