პოლიტიკა

სალომე ზურაბიშვილი – ვიცი, რომ ვეტო დაიძლევა, მაგრამ არ აქვს მნიშვნელობა, რადგან ამას გავაკეთებ ქუჩაში გამოსული ხალხის სახელით, რათა უბრალოდ ქუჩაში არ იდგნენ

1tv.ge წერს, ვიცი, რომ ვეტო დაიძლევა, მაგრამ ამას არ აქვს მნიშვნელობა, რადგან ამას გავაკეთებ ქუჩაში გამოსული ხალხის სახელით, რომ უბრალოდ ქუჩაში არ იდგნენ, – ამის შესახებ საქართველოს პრეზიდენტმა, სალომე ზურაბიშვილმა, გამოცემა „ეუროაქტივთან“ ინტერვიუში განაცხადა.

საქართველოს პრეზიდენტის განცხადებით, არავის სჯერა, რომ კანონში რაიმე ცვლილებას შეუძლია, რეალურად შეცვალოს სიტუაცია ან მიმართულება და ამიტომაც გამოდის ამდენი ხალხი ქუჩაში.

„ეს კანონი უფრო მეტია, ვიდრე უბრალოდ კანონი. მთელი თავისი შინაარსითა და ფორმით, ის წააგავს რუსეთის კანონს და არის აშკარა მცდელობა დააშინოს არასამთავრობო სამოქალაქო საზოგადოების ორგანიზაციები ჩვენთვის ძალიან მგრძნობიარე დროს, ზუსტად 26 ოქტომბრის არჩევნებამდე. მიზანიც კი გასაგებია, რადგან ეს არასამთავრობო ორგანიზაციები ჩაერთვებიან მომავალი არჩევნების დაკვირვებაში. ეს კანონპროექტი ცვლის ჩვენს დასავლელ პარტნიორებთან და მეგობრებთან ურთიერთობის პირობებს, რადგან მათ განიხილავს დივერსიისა და რევოლუციის აგენტებად, რომლებიც ცდილობენ დღევანდელი ხელისუფლების დამხობას. ის სამიზნეში იღებს სწორედ იმ ორგანიზაციებს, რომლებმაც ააშენეს ეს ქვეყანა ჩვენი დამოუკიდებლობის მომენტიდან, მხარს უჭერენ დემოკრატიულ განვითარებას, სოფლის მეურნეობას, განათლებას და ჯანმრთელობას. ამას ნარატივი „თქვენ 30 წელი გვეხმარებოდით, ახლა კი უცხო გავლენის აგენტები ხართ“ არ ერგება. ბევრი ქართველი, საზოგადოების ძალიან დიდი ნაწილი, ამა თუ იმ მომენტში მუშაობდა საერთაშორისო, ევროპულ თუ ამერიკულ ორგანიზაციებთან. ეს მოიცავს იმ ადამიანებს, რომლებიც ახლა ხელისუფლებაში არიან, მაგალითად, პარლამენტის თავმჯდომარე, რომელიც 15 წლის განმავლობაში მუშაობდა გერმანულ ფონდში. მათი ლოგიკით, ეს მათ ასევე გავლენის აგენტებად აქცევს“, – განაცხადა სალომე ზურაბიშვილმა.

შეკითხვაზე, რატომ წარადგინა საქართველოს მთავრობამ კანონპროექტი მეორედ, საქართველოს პრეზიდენტი პასუხობს, რომ ეს აშკარა დაბრკოლებაა ევროპული მომავლისთვის, რადგან ამ მთავრობას, მმართველ პარტიას, არ სურს მისვლა იმ შედეგებთან, რაც მისაღწევია წლის ბოლომდე ევროკომისიის ცხრა ნაბიჯის შესრულებით.

სალომე ზურაბიშვილი ამბობს, რომ ძალიან მკაცრი რიტორიკა ისმის დასავლელი პარტნიორების წინააღმდეგ, განსაკუთრებით აღსანიშნავია ბიძინა ივანიშვილის 29 აპრილის გამოსვლა, რომელიც თითქმის ომის გამოცხადება იყო 30 წლიანი პარტნიორების წინააღმდეგ.

სალომე ზურაბიშვილის განცხადებით, ერთადერთი, ვისაც შეუძლია, შეცვალოს დღევანდელი ვითარების ფართო სურათი, არის თავად ხალხი არჩევნებზე.

„ჩვენ მშვიდად უნდა მოვემზადოთ არჩევნებისთვის და იმ როლისთვის, რომლის თამაში ევროკავშირს შეუძლია. მათ უნდა გაარკვიონ, რა არის საქართველოს არჩევანი არჩევნებზე და ეს უნდა დააყენონ ამ პირობებში. ან აგრძელებს გზას ევროკავშირისკენ და აჩქარებს, თუ ეს შესაძლებელია, ან სხვა მიმართულებით. ევროკავშირმა უნდა მოუსმინოს არა მხოლოდ ქუჩაში გამოსულებს, არამედ იმას, თუ რას იტყვის ხალხი არჩევნებზე, რომელიც იქნება რეფერენდუმის ტიპის. შედეგიდან გამომდინარე, ეს გადაწყვეტს, შეაჩერებენ თუ არა ისინი (ევროკავშირი) ვიზალიბერალიზაციას თუ სხვა პროცესებს“, – განაცხადა სალომე ზურაბიშვილმა.

საქართველოს პრეზიდენტმა ასევე აღნიშნა, რომ მთავრობასთან დიალოგის მცდელობები არის, თუმცა ხელისუფლების ნდობა არ შეიძლება, რადგან სანდოობის არსებობის შემთხვევაში, თავიდან ამ ნაბიჯებს არ გადადგამდნენ.

სანქციებზე საუბრისას, სალომე ზურაბიშვილმა განაცხადა, რომ არ შეიძლება საუბარი საქართველოს მიმართ სანქციებზე, როგორც ქვეყანაზე, როდესაც ხალხი ქუჩებში ევროპული დროშებით აპროტესტებს ინიციატივას, პირად სანქციებზე კი კომენტარს არ გააკეთებს.

სალომე ზურაბიშვილს კითხვა დაუსვეს ევროპული პლატფორმის ინიციატივაზე, რაზეც თქვა, რომ წარადგენს ევროპული სამოქმედო გეგმის პლატფორმას იმ ნაბიჯებით, რომელიც საქართველოს მომავალმა პარლამენტმა უნდა გადადგას.

„მე მას შევთავაზებ საზოგადოებას და პოლიტიკურ პარტიებს, რათა ისინი კვლავ გაერთიანდნენ ამ საერთო მიზნის მისაღწევად, იმავდროულად, თავისუფლად იმოქმედონ საკუთარი პოლიტიკური დღის წესრიგის შესაბამისად. იმედი მაქვს, პოლიტიკური პარტიების უმეტესობა ხელს მოაწერს, ვინც არჩევნებში მიდის. იგი მოიცავს მოწოდებას სწრაფად გააუქმოს ყველა კანონი, რომელიც ეწინააღმდეგება ევროპული რეფორმების რეკომენდაციების სულისკვეთებას“, – აღნიშნა საქართველოს პრეზიდენტმა.

ნახეთ მეტი
Back to top button