უკრაინის შეიარაღებულმა ძალებმა ერთ კვირაში თითქმის ორჯერ მეტი ტერიტორია დაიკავეს, ვიდრე რუსეთის არმიამ სამ თვეში

უკრაინის შეიარაღებულმა ძალებმა დაიკავეს კურსკის რეგიონში დაახლოებით 1000 კვადრატული კილომეტრის ფართობი, განაცხადა შეიარაღებული ძალების მთავარსარდალმა ალექსანდრე სირსკიმ ქვეყნის პრეზიდენტთან, ვოლოდიმირ ზელენსკისთან ვიდეოკონფერენციის დროს, წერს The Moscow Times. ამავდროულად, ფინური სამხედრო ღია მონაცემთა ანალიზის კომპანიის „Black Bird Group“-ის პასი პაროინენის უახლესი გამოთვლებით, რუსეთის არმიამ 3 მაისიდან 2 აგვისტომდე 592 კვადრატული კილომეტრი დაიკავა. ძირითადად, რუსეთის ფედერაცია მიიწევს დონეცკის ოლქის აღმოსავლეთით, ანგრევს პატარა სოფლებს და ცდილობს დაიკავოს პოკროვსკი, სადაც მდებარეობს უკრაინის მთავარი სამხედრო მომარაგების ცენტრი, ასევე ჩასოვ იარი, რომელიც მდებარეობს გორაზე, საიდანაც მეზობელ ქალაქებზე თავდასხმისთვის მოსახერხებელი გზები იხსნება. გარდა ამისა, რუსეთის შეიარაღებული ძალები შეიჭრნენ ხარკოვის რეგიონში მაისში, მაგრამ მათი წინსვლა იქ სწრაფად შეჩერდა. ამრიგად, ერთ კვირაში უკრაინულმა ქვედანაყოფებმა კურსკის რეგიონში 1,7-ჯერ მეტი ტერიტორია დაიკავეს, ვიდრე რუსულმა დანაყოფებმა სამ თვეში უკრაინაში, სადაც, პაროინენის გათვლებით, ისინი კვირაში 45 კვადრატულ კილომეტრზე ოდნავ მეტს მიიწევდნენ წინ. უკრაინის შეიარაღებული ძალების მიერ კონტროლირებადი ტერიტორიის ზუსტი დადგენა რთულია, მათ შორის, მიმდინარე ბრძოლებისა და ჯარების მუდმივი გადაადგილების გამო. ორშაბათს კურსკის ოლქის გუბერნატორის მოვალეობის შემსრულებელმა ალექსეი სმირნოვმა შეატყობინა რუსეთის პრეზიდენტს ვლადიმერ პუტინს, რომ უკრაინის არმიამ მოახერხა 28 დასახლების და 480 კვადრატული კმ.-ის აღება.