სომხურ ღვინოს შეუძლია კონკურენცია გაუწიოს მსოფლიოს საუკეთესო ნიმუშებს  –  მინისტრი

სომხურ ღვინოს შეუძლია კონკურენცია გაუწიოს მსოფლიოს საუკეთესო ნიმუშებს. ამის შესახებ ეკონომიკის მინისტრმა გევორგ პაპოიანმა ღვინის ტურიზმის მე-8 მსოფლიო კონფერენციის გახსნის წინ გამართულ ბრიფინგზე განაცხადა.

„ჩვენი ღვინის ხარისხი აღემატება მის აღიარებას და მის პოპულარიზაციაზე უნდა გავამახვილოთ ყურადღება. ბევრი საერთაშორისო ექსპერტი სომხურ ღვინოს სასიამოვნო აღმოჩენად მიიჩნევს და აღნიშნავს, რომ მას ბევრი მოყვარულის გაოცება შეუძლია”, – აღნიშნა მინისტრმა.

მან დასძინა, რომ სომხური ღვინოების უმეტესობა არა მხოლოდ აკმაყოფილებს ევროპულ სტანდარტებს, არამედ ხშირად აღემატება მათ. ამ კონტექსტში მნიშვნელოვანია არა მხოლოდ პოზიციების გაძლიერება უკვე ოკუპირებულ ბაზრებზე, არამედ საექსპორტო გეოგრაფიის გაფართოებაც ჩინეთის გათვალისწინებით.

„სხვა ალკოჰოლური სასმელების მოხმარების კლებასთან ერთად, ღვინოზე მოთხოვნა მკვეთრად იზრდება, რაც ახალ შესაძლებლობებს გვიხსნის“, – განაცხადა მინისტრმა.

მან აღნიშნა, რომ მწარმოებლებისთვის მნიშვნელოვანია ფასების სეგმენტის განსაზღვრა. ზოგიერთ ქვეყანაში 6 დოლარამდე ღირებულების ღვინოები მოთხოვნადია, ზოგში – 20 დოლარზე მეტი.

სომხეთის სტატისტიკური კომიტეტის მონაცემებით, 2023 წელს ქვეყანაში 14 მილიონ ლიტრზე მეტი ღვინო იქნა წარმოებული, რაც 11,7%-ით მეტია 2022 წელთან შედარებით.

სომხეთის  საბაჟო სამსახურის მონაცემებით, 2023 წლის პირველ ნახევარში სომხეთმა ღვინის ექსპორტის მოცულობა 17,6%-ით გაზარდა და 1,9 მლნ ლიტრამდე შეადგინა. ექსპორტირებული ღვინის ძირითადი მოცულობა რუსეთის ბაზარზე გავიდა 85,5%-იანი წილით.