სომხეთის რესპუბლიკა დაინტერესებულია ინდოეთიდან დამატებითი 155 მმ ATAGS საარტილერიო დანადგარების შეძენით.
ამის შესახებ Sputnik Armenia-ს განუცხადა ინდოეთის თავდაცვის კვლევისა და ანალიზის ინსტიტუტის გენერალურმა დირექტორმა სუდან ჩინოიმ.
“ATAGS არის ძალზე მანევრირებადი დანადგარები. ისინი დამზადებულია ინდოეთში და ძალზე წარმატებულია. სომხურმა მხარემ შეიძინა 6 ასეთი მოწყობილობა და კმაყოფილი დარჩა შესყიდვით“, – განაცხადა სუდან ჩინოიმ და შეახსენა, რომ დელიმ უკვე მიაწოდა Swathi სარადარო კომპლექსები ერევანს და ამ ტრანზაქციის ღირებულება 40 მილიონი დოლარი იყო. მისი თქმით, ინდური CPR-ები მსოფლიოში ერთ-ერთი საუკეთესოა და დიდი მოთხოვნაა მათზე.
ინდოეთის თავდაცვის კვლევისა და ანალიზის ინსტიტუტის გენერალურმა დირექტორმა ასევე დასძინა, რომ სომხეთი ასევე დაინტერესდა Pinaka-ს მრავალლულიანი სარაკეტო სისტემებით, რომელთა ღირებულება დაახლოებით 250 მილიონი დოლარია.
ჩინოი მიიჩნევს, რომ სომხეთსაც აქვს თავდაცვის ინდუსტრიის განვითარების პოტენციალი, რომელიც ამჟამად ორიენტირებულია სტარტაპებზე.
„სომხეთში სამი ასეთი კომპანია ფუნქციონირებს, რაც პატარა არაა, თუ გავითვალისწინებთ ქვეყნის მასშტაბებს და მოსახლეობას. ინდოეთში 120 ასეთი კომპანიაა. ასე რომ, სამხედრო ტექნოლოგიების სფეროში, განსაკუთრებით სტარტაპებთან დაკავშირებულ საკითხებში, ერევანსა და დელის შეუძლიათ აქტიური თანამშრომლობის დამყარება“, – განაცხადა ჩინოიმ.
ექსპერტმა ხაზგასმით აღნიშნა, რომ ინდოეთის სამხედრო ინდუსტრიის განვითარება ქვეყნის ერთ-ერთი წამყვანი მიმართულებაა. ბოლო დროს ინდური მხარე პოზიციონირებს არა მხოლოდ როგორც მწარმოებელი, არამედ სამხედრო პროდუქციის მიმწოდებელიც, იმავდროულად ცდილობს უზრუნველყოს თავდაცვის მიწოდების ჯაჭვის უსაფრთხოება და წაახალისოს მცირე და საშუალო საწარმოები. დელიმ 2024 წლისთვის დაახლოებით 2,5 მილიარდი დოლარის თავდაცვითი პროდუქცია გაიტანა. 2028 წლისთვის ინდოეთი გეგმავს ამ მაჩვენებლის გაზრდას 6,5 მილიარდ აშშ დოლარამდე.
მანამდე მასმედია წერდა, რომ ერევანმა 155,5 მილიონი დოლარის მოწინავე ბუქსირებადი საარტილერიო სისტემები (ATAGS) ჯერ კიდევ 2022 წელს შეუკვეთა. 155 მმ-იანი ბუქსირების ჰაუბიცების პირველი პარტია, რომელიც შედგება 6 ერთეულისგან, მიწოდებული იქნა 2023 წლის აგვისტოში.
ინდოეთის თავდაცვის სამინისტროს მონაცემებით, 2024-2025 ფისკალურ წელს სომხეთის მიერ ინდური წარმოების იარაღის შესყიდვების მთლიანმა მოცულობამ 600 მილიონ დოლარს მიაღწია.
2021 წლიდან სომხეთი ინდოეთიდან იძენს რაკეტებს, საარტილერიო სისტემებს, საზენიტო თავდაცვის სისტემებს და სხვა იარაღს.
