30 სექტემბერს, სომხეთში მსოფლიოში პირველი და უდიდესი ირანული სავაჭრო ცენტრი გაიხსნა. ცენტრის გახსნაში მონაწილეობა მიიღო სრ ეკონომიკის მინისტრმა გევორგ პაპოიანმა, სხვა ოფიციალურმა პირებმა, ირანის მინისტრებმა და ირანის ელჩმა მეჰდი სობჰანიმ.
გახსნაზე ელჩმა მეჰდი სობჰანიმ განაცხადა, რომ მათთვის დიდი პატივია სომხეთში მსოფლიოში უდიდესი ცენტრის გახსნა, რაც სომხეთთან ყველაზე ღრმა მეგობრობას მოწმობს.
„გულწრფელად ვიმედოვნებ, რომ ირანის სავაჭრო ცენტრის წყალობით, ორ ქვეყანას შორის ეკონომიკურ და სავაჭრო ურთიერთობებს დიდი იმპულსი მიეცემა. ორ ქვეყანას შორის ურთიერთობები ვაჭრობის, ეკონომიკის, ტრანსპორტის და ენერგეტიკის სფეროებში ძალიან სერიოზულ კაპიტალს შექმნის ორი ქვეყნის ხალხებისთვის.
ირანსა და სრ-ს შორის ვაჭრობის მოცულობამ სწრაფი ზრდა დააფიქსირა, ვიმედოვნებ, რომ ამ ცენტრის გახსნა კიდევ უფრო შეუწყობს ხელს. ჩვენ გადაწყვეტილი გვაქვს განვავითაროთ ურთიერთობები ყველა სფეროში“, – განაცხადა ირანის ელჩმა სომხეთში.
მისი თქმით, არსებობს ძლიერი პოლიტიკური ნება ქვეყნებს შორის თანამშრომლობისა და ურთიერთობების განსავითარებლად.
„ორი ქვეყნის ლიდერებმა ორ ქვეყანას შორის ვაჭრობისთვის 3 მილიარდი დოლარის ზღვარი დააწესეს და ჩვენ მთელი ძალ-ღონე უნდა გამოვიყენოთ იმისათვის, რომ ის რეალობად იქცეს“, – განაცხადა მან.
