„მშვიდობის გზაჯვარედინი“ პროექტის ფარგლებში სომხეთი მიზნად ისახავს სწრაფად და საიმედოდ დააკავშიროს ინდოეთის ოკეანე შავ ზღვასთან. ამის შესახებ ეკონომიკის მინისტრმა გევორგ პაპოიანმა ევრაზიის ეკონომიკური კავშირის მესამე ფორუმის პანელზე განაცხადა.
„ამ სტრატეგიის ერთ-ერთი მნიშვნელოვანი ელემენტი იქნება სომხეთის წარმომადგენლობის გახსნა ირანის პორტ ჩაბაჰარში, რაც გააძლიერებს ჩვენს სავაჭრო კავშირებს არა მხოლოდ ირანთან, არამედ ინდოეთთან. მარშრუტი სომხეთის ტერიტორიაზე სასიცოცხლო მნიშვნელობის იქნება არა მხოლოდ სომხეთისთვის, არამედ ინდოეთისთვისაც, რომელიც ცდილობს დივერსიფიკაცია გაუწიოს ნაკადებს, მარაგებს“, – განაცხადა პაპოიანმა.
მინისტრის თქმით, ტვირთი ინდოეთის მუმბაის პორტიდან ჩაბაჰარის პორტში, შემდეგ სომხეთის ტერიტორიის გავლით საქართველოს პორტებში, შემდეგ კი საბერძნეთში, ბულგარეთში, რუმინეთსა და ევროკავშირის სხვა ქვეყნებში გადაიგზავნება.
