კრემლმა რუსულ მედიას „აუხსნა“, თუ როგორ გააშუქოს სომხეთის არჩევნების შედეგები
MEDUZA
საერთაშორისო რუსულენოვანი პერიოდული გამოცემა „მედუზას“ ცნობით, რუსეთის ხელისუფლებამ პროსამთავრობო მედიასაშუალებებს „აუხსნა“, თუ როგორ გააშუქონ სომხეთის საპარლამენტო არჩევნების შედეგები. პუბლიკაცია ასევე წარმოგვიდგენს მაგალითებს, თუ როგორ აქცენტს აკეთებენ რუსული ძირითადი მედიასაშუალებები არჩევნების გაშუქებისას.
ქვემოთ მოცემულია სტატიის თარგმანი:
„რუსეთის პრეზიდენტის ადმინისტრაციამ „ურჩია“ სახელმწიფო და პროსამთავრობო მედიასაშუალებებს, თავიანთ გაშუქებაში ხაზი გაუსვან იმ ფაქტს, რომ სომხეთის პრემიერ-მინისტრ ნიკოლ ფაშინიანის პარტიამ „სამოქალაქო კონტრაქტი“ არჩევნებში ხმების 50%-ზე ნაკლები მიიღო. ამის შესახებ „მედუზას“ კრემლთან დაახლოებული ერთ-ერთი მთავარი მედიასაშუალების თანამშრომელმა შეატყობინა.
მედიასაშუალებებს დაეავალათ, არჩევნების შედეგები ფაშინიანის „დამარცხებად“ წარმოედგინათ და სწორედ ამ სიტყვის გამოყენება ურჩიეს. უფრო მეტიც, პრეზიდენტის ადმინისტრაციის პოლიტიკურმა ბლოკმა „ურჩია“, რომ ხაზი გაესვათ საარჩევნო დარღვევებზე, რათა „ეჭვები შეეტანათ ფაშინიანის ლეგიტიმურობაში“.
სომხეთის ცენტრალური საარჩევნო კომისიის მონაცემებით, არჩევნებში პარტია „სამოქალაქო კონტრაქტმა“ ხმების 49.81% მიიღო. ფაშინიანის პარტიამ პარლამენტში 105 ადგილიდან 61 მიიღო.
როგორ გააშუქა არჩევნები რუსულმა ტელევიზიამ
• პირველი არხი: „ოფიციალური მონაცემებით, ნიკოლ ფაშინიანის „სამოქალაქო კონტრაქტის“ პარტიამ ხმების 50%-ზე ოდნავ ნაკლები დააგროვა, მაგრამ მან მთავრობის დამოუკიდებლად ფორმირების უფლება მიიღო“.
• Rossiya 1. „სომხეთის რესპუბლიკის ცენტრალურმა საარჩევნო კომისიამ ხმების დათვლა დაასრულა. მმართველმა პარტიამ „სამოქალაქო კონტრაქტი“ ხმების 50%-ზე ნაკლები მიიღო, ხოლო ოპოზიციამ, უპრეცედენტო ზეწოლის მიუხედავად, პრემიერ-მინისტრ ნიკოლ ფაშინიანის პოლიტიკის წინააღმდეგ სულ დაახლოებით 40%, ანუ 460 000 ხმა მიიღო“.
• NTV: „წინასწარი მონაცემებით, ნიკოლ ფაშინიანის პარტიამ „სამოქალაქო კონტრაქტი“ ხმების 49%-ზე ოდნავ მეტი მიიღო“.
როგორ გააშუქეს სახელმწიფო სააგენტოებმა და სხვა პროსამთავრობო მედიასაშუალებებმა არჩევნები:
რია ნოვოსტი
არჩევნების შედეგების შესახებ სიახლე გამოქვეყნდა სათაურით „ფაშინიანის პარტიამ სომხეთის არჩევნებში ხმების 50% ვერ მიიღო“. შემდეგ, სააგენტოს ვებსაიტზე მთავარი სიახლე იყო „ზახაროვამ განაცხადა, რომ სომხეთის ხელისუფლებამ უხეშად დაარღვია საარჩევნო პროცედურები“.
„რია ნოვოსტიმ“ ასევე გაავრცელა ინფორმაცია, რომ „ერევანში ბევრი ამომრჩეველი იმედგაცრუებულია არჩევნების შედეგებით“ და რომ დსთ-ს საპარლამენტთაშორისო ასამბლეამ „გაავრცელა ინფორმაცია არჩევნების დროს გამეფებული რთული ატმოსფეროს შესახებ“. ბიულეტენების დამუშავების პროცესში სახელმწიფო სააგენტომ გაავრცელა ინფორმაცია, რომ „ფაშინიანის პარტიის ლიდერობა არჩევნებში შემცირდა“ და „კვლავ კლებას განაგრძობს“.
„რია ნოვოსტიმ“ ასევე გამოაქვეყნა სვეტი სათაურით „ნიკოლ ფაშინიანის პიროსის გამარჯვება“, რომელიც დაწერა სააგენტოს მიმომხილველმა ირინა ალკსნისმა.
ტასი
არჩევნების შედეგების შესახებ სიახლე გამოქვეყნდა სათაურით „სომხეთის ცენტრალური საარჩევნო კომისია: ფაშინიანის პარტიამ წინასწარი მონაცემებით ხმების 49,81% მიიღო“. სააგენტომ ასევე გამოაქვეყნა შემდეგი სიახლე:
• „რუსეთი სომხეთის არჩევნებში დარღვევების შესახებ მრავალრიცხოვან ინფორმაციას ხედავს: პესკოვი“.
• „სომხეთის არჩევნები ოპოზიციაზე ზეწოლის ფონზე ჩატარდა – ზახაროვა“.
• „ზახაროვა – სომხეთში საარჩევნო კამპანიის დროს დევნა მიმართული იყო იმ პირების მიმართ, ვინც რუსეთთან კავშირებს ინარჩუნებდა“.
• „წარუკიანის პარტია „აყვავებული სომხეთი“ ცენტრალურ საარჩევნო კომისიას ხმების გადათვლის მოთხოვნით მიმართავს“.
• „ფაშინიანის პარტიამ კონსტიტუციური უმრავლესობა ვერ მიიღო – ექსპერტი ჰოვჰანსიან“.
• „დსთ-ს საპარლამენტთაშორისო ასამბლეამ სომხეთის არჩევნების დროს დაპატიმრებების დიდი რაოდენობა აღნიშნა“.
ამავდროულად, TASS-მა გამოაქვეყნა მიმოხილვითი სტატია სახელწოდებით „ფაშინიანის პარტია ერთიანი მთავრობის ფორმირების უფლებას იღებს – სომხეთის არჩევნების შედეგები“.
„ინტერფაქსი“
„ინტერფაქსმა“ არჩევნების შედეგები შეაჯამა სათაურით „ფაშინიანის პარტიამ სომხეთის არჩევნებში ხმების 49,81% მიიღო, ხმების 100%-ის დათვლის შემდეგ“. „ინტერფაქსი“ ასევე იტყობინება, რომ „კრემლი სომხეთში არჩევნების დარღვევების შესახებ ინფორმაციას ავრცელებს“.
„ვედომოსტი“
• „არჩევნების შედეგები სომხეთში: ფაშინიანის პარტიამ ხმების 50%-ზე ნაკლები მიიღო“.
• „კრემლი სომხეთში არჩევნების დარღვევების შესახებ ინფორმაციას ავრცელებს“.
RBC
სააგენტოს ვებსაიტზე გამოქვეყნდა სტატია სახელწოდებით „სომხეთში საპარლამენტო არჩევნების შედეგები“, რომელშიც გამარჯვებულიც კი არ იყო ნახსენები. მოსკოვის დროით 15:00 საათის მონაცემებით, RBC-ის ვებსაიტზე მთავარი სიახლე იყო „მოსკოვი სომხეთში არჩევნებში დემოკრატიული პროცედურების დარღვევის შესახებ ინფორმაციას ავრცელებს“.
