ახურიკ-გიუმრის რკინიგზის მონაკვეთის აღდგენის ტენდერი უკვე გამოცხადებულია: პრემიერ-მინისტრი
სომხეთის რესპუბლიკის პრემიერ-მინისტრმა ნიკოლ ფაშინიანმა განაცხადა, რომ მთავრობა აგრძელებს მუშაობას სომხეთის რკინიგზის ინფრასტრუქტურის გასაუმჯობესებლად და ტენდერი უკვე გამოცხადებულია ახურიკ-გიუმრის მონაკვეთის აღდგენის პროგრამისთვის.
“არმენპრეს”-ის ცნობით, ეროვნული ასამბლეის კომიტეტების ერთობლივ სხდომებზე 2025 წლის სახელმწიფო ბიუჯეტის შესრულების წლიური ანგარიშის განხილვისას, პრემიერ-მინისტრმა აღნიშნა, რომ რკინიგზის ინფრასტრუქტურის განვითარება კვლავ რჩება სომხეთის მთავრობის ყურადღების ცენტრში.
“ასევე მინდა ვთქვა, რომ სომხეთში, ზოგადად, ჩვენ ვახორციელებთ სამუშაოებს რკინიგზის ინფრასტრუქტურის უკეთეს მდგომარეობაში მოსაყვანად”, – თქვა ფაშინიანმა.
პრემიერ-მინისტრის თქმით, ახურიკ-გიუმრის რკინიგზის მონაკვეთის აღდგენის პროგრამის მოსამზადებელი სამუშაოები უკვე დაწყებულია. “ამ ეტაპზე, ასევე გამოცხადებულია ტენდერი ახურიკ-გიუმრის მონაკვეთის აღდგენისთვის, რომელიც სახელმწიფო ბიუჯეტის სახსრებით განხორციელდება”, – აღნიშნა მან.
ფაშინიანმა დასძინა, რომ რკინიგზის ინფრასტრუქტურის განვითარებაზე მუშაობა გაგრძელდება და მთავრობა ახალი პროგრამების განხორციელებას საერთაშორისო პარტნიორების ჩართულობითაც გეგმავს. „რა თქმა უნდა, მომავალში რკინიგზასთან დაკავშირებულ გარკვეულ პროგრამებსაც განვახორციელებთ, მათ შორის საერთაშორისო პარტნიორებთან ერთად“, – განაცხადა პრემიერ-მინისტრმა.
