აშშ-ის სახელმწიფო დეპარტამენტმა მთიანი ყარაბაღიდან რუსი სამშვიდობოების გაყვანაზე კომენტარი გააკეთა
აშშ-ის სახელმწიფო დეპარტამენტმა მთიანი ყარაბაღიდან რუსული სამშვიდობო ძალების გაყვანაზე კომენტარი გააკეთა.
Armenpress-ის ინფორმაციით, ბრიფინგზე საკითხს აშშ-ის სახელმწიფო დეპარტამენტის პრესსპიკერის მოადგილე ვედანტ პატელი შეეხო.
მან შეახსენა, რომ შეერთებული შტატები არ არის დადებული სამმხრივი შეთანხმების მხარე, რომლითაც დასრულდა საომარი მოქმედებები მთიან ყარაბაღში 2020 წელს და იქ რუსეთის ჯარები განლაგდნენ.
„მართალი გითხრათ, ჩვენ ვერაფერი გვინახავს, რაც მიუთითებდა იმაზე, რომ რუსი სამხედროები წვლილს შეიტანენ სამხრეთ კავკასიის უფრო მშვიდობიან და სტაბილურ რეგიონში და მოვლენები, რაც გასულ შემოდგომაზე მთიან ყარაბაღში მოხდა, ამ თვალსაზრისით ძალიან მისანიშნებელია. და ეს არის კიდევ ერთი მნიშვნელოვანი წერტილი ან მაგალითი იმისა, თუ რამდენად არასანდო მოკავშირე ან პარტნიორია რუსეთი“, – განაცხადა სახელმწიფო სამინისტროს პრესსპიკერმა, უპასუხა რა კითხვას, როგორ განმარტავს ის ინფორმაციას იმის შესახებ, რომ რუსეთის ფედერაციას მთიანი ყარაბაღიდან ჯარები გაჰყავს და უკრაინაში გადაჰყავს და რა გავლენას მოახდენს ეს სამხრეთ კავკასიაში არსებულ ვითარებაზე.
მან დასძინა, რომ შეერთებული შტატები მტკიცედ უჭერს მხარს სომხეთისა და აზერბაიჯანის ძალისხმევას ხანგრძლივი და ღირსეული მშვიდობის მისაღწევად და მზად არის გააგრძელოს ამ პროცესის მხარდაჭერა.
გუშინ რუსეთის ფედერაციის პრეზიდენტის პრესმდივანმა დიმიტრი პესკოვმა დაადასტურა, რომ მთიანი ყარაბაღიდან რუსი სამშვიდობოების გაყვანის პროცესი დაიწყო.
