თურქული მედიკამენტები საქართველოში. ჯანდაცვის მინისტრმა ეს საკითხი თურქეთის ახალ ელჩთან განიხილა
საქართველოს ჯანდაცვის მინისტრი ზურაბ აზარაშვილი თურქეთის ახალ ელჩს ქვეყანაში ალი კაან ორბანს შეხვდა და მასთან ორმხრივი ურთიერთობების საკითხი განიხილა.
“არმენპრესის” ცნობით, ამის შესახებ იტყობინება ქვეყნის ჯანდაცვის სამინისტრო. შეხვედრაზე განსაკუთრებული ყურადღება დაეთმო თურქეთიდან პრეპარატების შემოტანის შემდეგ საქართველოში მედიკამენტებზე ფასების შემცირებას. აზარაშვილმა თურქეთის ელჩთან სამომავლო გეგმები და ორმხრივი თანამშრომლობის პერსპექტივებიც განიხილა. შეხვედრას ასევე ესწრებოდა ელჩის მრჩეველი გიზემ თურქგენჯი-სევიმი.
მედიკამენტებზე ფასების შემცირების მიზნით, საქართველოს მთავრობამ თურქეთის ფარმაცევტული ბაზარი გახსნა. მიმდინარე წლის იანვრის შუა რიცხვებიდან საქართველომ თურქეთის ფარმაცევტული ბაზრიდან უკვე 200-ზე მეტი დასახელების მედიკამენტი მიიღო. შედეგად, მედიკამენტებზე ფასები 80 პროცენტამდე შემცირდა. 2021 წლის ნოემბერში პრემიერ-მინისტრმა ირაკლი ღარიბაშვილმა აღიარა, რომ ქვეყნის ფარმაცევტულ ბაზარს ესაჭიროება საკანონმდებლო ცვლილებები, მათ შორის მედიკამენტების ფასების რეგულირება.
საქართველოს ჯანდაცვის სამინისტრომ შეიმუშავა სამოქმედო გეგმა ფარმაცევტული პროდუქტების სფეროში, კონკურენციის სააგენტოს რეკომენდაციების, ჯანმო-ს კვლევის შედეგების გათვალისწინებით, ადგილობრივი და უცხოელი ექსპერტებისა და საერთაშორისო გამოცდილების გამოყენებით, იტყობინება Sputnik.
