ყოველთა სომეხთა კათოლიკოსმა შვეიცარიაში გამართულ კონფერენციაზე ბაქოში უკანონოდ დაკავებული სომეხი პატიმრების საკითხი წამოჭრა
ეჯმიაწინის დედა საყდრის ინიციატივითა და ყოველთა სომეხთა კათოლიკოსის წინადადებით, ეკლესიათა მსოფლიო საბჭომ შვეიცარიაში საერთაშორისო კონფერენცია მოაწყო სახელწოდებით „რელიგიური თავისუფლება: სომხური სულიერი, კულტურული და ისტორიული მემკვიდრეობის შენარჩუნება არცახში“.
Armenpress-ის ცნობით, კონფერენციის გახსნისას ყოველთა სომეხთა კათოლიკოსმა გარეგინ II-მ მკაცრად გააკრიტიკა აზერბაიჯანის ქმედებები.
მან განაცხადა, რომ თურქეთის სამხედრო მხარდაჭერით, აზერბაიჯანმა არა მხოლოდ მთლიანად დაცალა არცახი, არამედ აგრძელებს ახალი მოთხოვნების წარდგენას სამშვიდობო ხელშეკრულების პროცესში.
კათოლიკოსმა საერთაშორისო საზოგადოების ყურადღება მიაპყრო იმ ფაქტზე, რომ აზერბაიჯანს მთიან ყარაბაღში მძევლად ჰყავს ყოფილი პოლიტიკური ლიდერები, მშვიდობიანი მოსახლეობა და სამხედრო ტყვეები, ატარებს მათ წინააღმდეგ შეთხზულ, საჩვენებელ სასამართლო პროცესებს, რომლებსაც თან ახლავს საერთაშორისო სამართლის აშკარა დარღვევები.
მან ასევე ხაზგასმით აღნიშნა, რომ ყველა ეს ქმედება განპირობებულია ეროვნული იდენტობითა და ანტისომხური პოლიტიკით, რომლის მიზანია სომეხი ხალხის სულიერი და კულტურული მემკვიდრეობის განადგურება.
მისი თქმით, მთიანი ყარაბაღის უძველესი ეკლესიები და მონასტრები ალბანურად არის გამოცხადებული, მათი ნამდვილი იდენტობა დამახინჯებულია და მრავალი წმინდა ადგილი, დასახლება და სასაფლაო ბარბაროსულად განადგურებულია.
თავის გამოსვლაში კათოლიკოსმა გაიხსენა, რომ არცახის სომხებმა საუკუნეების განმავლობაში შექმნეს უაღრესად ღირებული კულტურა თავიანთ სამშობლოში, რითაც გაამდიდრეს კაცობრიობის მემკვიდრეობა. მან ხაზგასმით აღნიშნა, რომ დღეს, უფრო მეტად, ვიდრე ოდესმე, მთიანი ყარაბაღის სულიერი და კულტურული მემკვიდრეობის შენარჩუნება აქტუალურია.
ეკლესიათა მსოფლიო საბჭოს გენერალურმა მდივანმა კონფერენციაზე ხაზგასმით აღნიშნა, რომ ქრისტიანები მოწოდებულნი არიან იყვნენ სიმართლის მოწმეები, იდგნენ მსხვერპლთა გვერდით და ხმა აიმაღლონ ბოროტების წინააღმდეგ.
