ინდოეთი სომხეთს ირანიდან თავისი მოქალაქეების ევაკუაციის უსაფრთხო მარშრუტად მიიჩნევს

ისრაელსა და ირანს შორის მზარდი დაძაბულობის ფონზე, ინდოეთმა ირანში მაღალი რისკის ზონებიდან თავისი მოქალაქეების ევაკუაცია დაიწყო და აქტიურად განიხილავს სომხეთის გავლით ევაკუაციის ვარიანტებს, იტყობინება The New Indian Express.

ინდოეთის საგარეო საქმეთა სამინისტრომ ორშაბათს დაადასტურა, რომ ინდოეთის მოქალაქეები, მათ შორის სტუდენტები, თეირანში ინდოეთის საელჩოს მეთვალყურეობის ქვეშ ირანში უფრო უსაფრთხო ადგილებში გადაჰყავთ.

მთავრობა სწავლობს ევაკუაციის მარშრუტებს და მიმდინარეობს მოლაპარაკებები სომხეთის უსაფრთხო დანიშნულების ადგილად გამოყენების შესახებ.

ოფიციალური პირების თქმით, ინდოეთის საგარეო საქმეთა მინისტრი ს. ჯაიშანკარი შეხვდა თავის სომეხ კოლეგას, არარატ მირზოიანს, რათა განეხილათ ლოგისტიკური და დიპლომატიური კოორდინაცია.

ინდოეთის მთავრობის ცნობით, 2022 წლის მონაცემებით, ირანში დაახლოებით 10 000 ინდოეთის მოქალაქე ცხოვრობდა, მათ შორის 2000-ზე მეტი სტუდენტი.