ბოლო სამი წლის განმავლობაში სომხეთის სამხედრო-სამრეწველო კომპლექსში 170 მილიარდი დრამის შეკვეთები განხორციელდა, რის შედეგადაც ათობით საწარმო და ქარხანა შეიქმნა.
Armenpress-ის ცნობით, ამის შესახებ სომხეთის რესპუბლიკის პრემიერ-მინისტრმა ნიკოლ ფაშინიანმა ჟურნალისტებთან ბრიფინგზე განაცხადა, რესპუბლიკის დღეს გასამართი სამხედრო აღლუმის რეპეტიციებიდან მის მიერ გამოქვეყნებულ ვიდეოზე დაყრდნობით, საიდანაც ირკვევა, რომ სამხედრო აღლუმის დროს ასევე იქნება სომხური წარმოების სადაზვერვო და დამრტყმელი უპილოტო საფრენი აპარატის დემონსტრირება.
ფაშინიანის თქმით, სამხედრო ინდუსტრიის განვითარება განვითარებადი სახელმწიფოს ბუნებრივ პროცესად უნდა განვიხილოთ.
„ვფიქრობ, რომ ჩვენს შეფასებებში თავიდან მაქსიმალურად უნდა ავიცილოთ პათეტიკა, რადგან უნდა გვესმოდეს, რომ ეს განვითარებადი სახელმწიფოსთვის ნორმალური მოვლენაა“, – განაცხადა პრემიერ-მინისტრმა.
მისი თქმით, სამხედრო-სამრეწველო სექტორში განხორციელებული შეკვეთების შედეგად, ახალი წარმოება შეიქმნა.
„ბოლო სამი წლის განმავლობაში, სომხეთის სამხედრო-სამრეწველო კომპლექსში 170 მილიარდი დრამის შეკვეთები განვათავსეთ, შეიქმნა ათობით საწარმო და ქარხანა, რომლებიც პროდუქციას აწარმოებენ“, – აღნიშნა ფაშინიანმა.
პრემიერ-მინისტრმა მოუწოდა მოქალაქეებს, დაესწრონ 28 მაისს რესპუბლიკის მოედანზე დაგეგმილ ღონისძიებას.
„სომხეთის რესპუბლიკის ყველა მოქალაქე უნდა იყოს რესპუბლიკის მოედანზე, რათა დააფიქსირონ, რომ სომხეთის რესპუბლიკას ახალი ხარისხის, ახალი დონისა და ახალი ლოგიკის არმია ჰყავს“, – განაცხადა მან.
მანამდე, სრ პრემიერ-მინისტრმა ნიკოლ ფაშინიანმა გამოაქვეყნა ვიდეოები 28 მაისს გასამართი სამხედრო აღლუმის რეპეტიციებიდან. ერთ-ერთ ვიდეოში ნაჩვენები იყო სომხური წარმოების სადაზვერვო დრონი, ხოლო მეორეში, სავარაუდოდ, ფრანგული CAESAR-ის საარტილერიო სისტემები.
28 მაისს რესპუბლიკის მოედანზე დაგეგმილ სამხედრო აღლუმზე წარმოდგენილი იქნება სომხეთის მიერ ბოლო წლებში შეძენილი შეიარაღება.
