ოვერჩუკმა განაცხადა, რომ სომხეთს გარკვეულ მომენტში მოუწევს არჩევანის გაკეთება ევრაზიულ ეკონომიკურ კავშირსა და ევროკავშირს შორის

რუსეთი გაგებით მიუდგება ყველა არჩევანს, რომელსაც სომეხი ხალხი გააკეთებს.

„არმენპრემის“ ცნობით, ამის შესახებ რუსეთის ვიცე-პრემიერმა ალექსეი ოვერჩუკმა განაცხადა, როდესაც უპასუხა TASS-ის კითხვას სომხეთის დასავლეთთან დაახლოების შესახებ.

„რა თქმა უნდა, როგორც რუსეთის პრეზიდენტმა ვლადიმერ პუტინმა არაერთხელ თქვა, ჩვენ გაგებით მივუდგებით ყველა არჩევანს, რომელსაც სომეხი ხალხი გააკეთებს“, – თქვა რუსეთის ვიცე-პრემიერმა.

ოვერჩუკმა ასევე აღნიშნა, რომ გარკვეულ ეტაპზე სომხეთის ხელმძღვანელობას მოუწევს არჩევანის გაკეთება ევროკავშირსა და ევრაზიულ ეკონომიკურ კავშირს შორის.

„სომხეთში საუბრობენ ევროკავშირთან დაახლოებისკენ სწრაფვაზე. ჩვენ არაერთხელ გვითქვამს, რომ ევრაზიულ ეკონომიკურ კავშირსა და ევროკავშირში წევრობა შეუთავსებელია. სომხეთშიც კარგად ესმით ეს და ქვეყნის ხელმძღვანელობაც საუბრობს ამაზე, რომ ისინი შეუთავსებლები არიან. გარკვეულ ეტაპზე მათ მოუწევთ ამ არჩევანის გაკეთება, თუ გადაწყვეტენ, რომ ეს არჩევანის გაკეთება სჭირდებათ“, – ხაზგასმით აღნიშნა ალექსეი ოვერჩუკმა.

რუსეთის ვიცე-პრემიერმა ასევე განაცხადა, რომ სომხეთი რუსეთის მოკავშირეა, ორ ქვეყანას ღრმა და დიდი ხნის მეგობრული კავშირები აერთიანებს. „მოსკოვი დიდ პატივს სცემს სომეხ ხალხს. სომხეთი ჩვენთვის ძალიან ახლო, მოკავშირე ქვეყანაა. ის ევრაზიის ეკონომიკური კავშირის, დამოუკიდებელ სახელმწიფოთა თანამეგობრობის, კოლექტიური უსაფრთხოების ხელშეკრულების ორგანიზაციის წევრია. უბრალოდ, ადამიანური კავშირები, რომლებიც გვაერთიანებს, ძალიან ღრმა, ძალიან სერიოზულია“, – აღნიშნა ოვერჩუკმა.