ევროკავშირის საგარეო საქმეთა მინისტრებმა განიხილეს სომხეთის მდგრადობისა და ეკონომიკური დივერსიფიკაციის გაძლიერების გზები –  კალასი

ევროკავშირის საგარეო საქმეთა და უსაფრთხოების პოლიტიკის უმაღლესმა წარმომადგენელმა, კაია კალასმა, შეაჯამა 15 ივნისს ლუქსემბურგში გამართული ევროკავშირის საგარეო საქმეთა მინისტრების საბჭოს სხდომის შედეგები, ასევე შეეხო სომხეთში ჩატარებულ საპარლამენტო არჩევნებს.

 „სომხეთი: გასული კვირის არჩევნებმა ნათელი გზავნილი გაგზავნა: სომეხმა ხალხმა ხმა მისცა მშვიდობას, სუვერენიტეტს და ევროპასთან უფრო მჭიდრო კავშირებს. რუსეთის ძლიერმა ზეწოლამ და ეკონომიკურმა იძულებამ გავლენა ვერ  მოახდინა ხმის მიცემაზე. მინისტრებმა განიხილეს, თუ როგორ შეგვიძლია კიდევ უფრო გავაძლიეროთ სომხეთის მდგრადობა და ეკონომიკური დივერსიფიკაციის გზები“, – დაწერა კალასმა თავის Facebook გვერდზე.

შეგახსენებთ, რომ 15 ივნისს, სომხეთის საგარეო საქმეთა მინისტრმა, არარატ მირზოიანმა, მონაწილეობა მიიღო ლუქსემბურგში გამართულ დისკუსიაში, ევროკავშირის საგარეო საქმეთა მინისტრების საბჭოს სესიის ფარგლებში.

14 ივნისს, ცენტრალურმა საარჩევნო კომისიამ სომხეთში 7 ივნისს ჩატარებული საპარლამენტო არჩევნების საბოლოო შედეგები შეაჯამა. არჩევნების შედეგების მიხედვით, პარლამენტში 3 პოლიტიკური ძალა შევიდა: პარტია „სამოქალაქო კონტრაქტი“, რომელსაც 64 მანდატი ექნება, ბლოკი „ძლიერი სომხეთი“, რომელსაც 29 მანდატი ექნება და ბლოკი „სომხეთი“, რომელსაც 12 მანდატი ექნება.