Mehr-ის ცნობით, ირანის ენერგეტიკის მინისტრმა აბას ალიაბადიმ და სომხეთის ტერიტორიული მართვისა და ინფრასტრუქტურის მინისტრმა დავით ხუდათიანმა თანამშრომლობის საკითხები განიხილეს.
მხარეებმა ხაზი გაუსვეს მესამე ელექტროგადამცემი ხაზის მშენებლობის 12-წლიანი პროექტის განხორციელებისა და დასრულების დაჩქარების აუცილებლობას და ასევე გადაწყვიტეს თანამშრომლობის გაგრძელება პროექტის განხორციელების დასაჩქარებლად.
შეხვედრაზე ირანის ენერგეტიკის მინისტრმა მეღრის ჰიდროელექტროსადგურის მშენებლობის საკითხი წამოჭრა, ხოლო სომხურმა მხარემ, ადრე მიღწეულ შეთანხმებებზე დაყრდნობით, გამოაცხადა მზადყოფნა, ითანამშრომლოს ამ ელექტროსადგურის მშენებლობაში. ასევე გამოცხადდა, რომ ომანურმა კომპანიამ გამოთქვა მზადყოფნა, დააფინანსოს და განახორციელოს მეღრის ელექტროსადგურის მშენებლობის პროექტი.
შეხვედრაზე ასევე განიხილეს ირან-სომხეთი-საქართველო-რუსეთის ელექტროგადამცემი დერეფნების შექმნის საკითხი.
თეირანმა გამოაცხადა მზადყოფნა, რომ სომხეთსა და საქართველოს შორის ელექტროგადამცემი ხაზის მშენებლობა ირანულმა კომპანიებმა განახორციელონ.
ირანის ენერგეტიკის მინისტრმა ასევე მხარი დაუჭირა არაქსის მდინარის დაბინძურების საკითხზე სამუშაო ჯგუფის სხდომის ჩატარების იდეას.
შეხვედრის ფარგლებში, ენერგეტიკის მინისტრმა, აღნიშნა რა, რომ ირანი და სომხეთი ორი მეზობელი და მოძმე ქვეყანაა, რომლებსაც ურთიერთობებისა და თანამშრომლობის ხანგრძლივი ისტორია აქვთ, ქვეყნებს შორის ორმხრივი თანამშრომლობის განვითარებას შეეხო და განაცხადა: „ორივე ქვეყანა ყოველთვის ცდილობდა ამ ურთიერთობების განვითარებას. სომხეთის ტერიტორიული მართვისა და ინფრასტრუქტურის მინისტრის ვიზიტის მიზანია დაუმთავრებელი პროექტების განხილვა და მათი დასრულება, ასევე ახალი ერთობლივი პროექტების დაწყება. მე მჯერა, რომ ეს ვიზიტი ამ მხრივ ძალიან მნიშვნელოვანი და პროდუქტიული შეიძლება იყოს. ჩვენთვის საინტერესო ერთ-ერთი უმნიშვნელოვანესი პროექტია ირანის ელექტროქსელის ჩრდილოეთ ქვეყნებთან დაკავშირება და სომხეთი ამ მარშრუტის ერთ-ერთი მთავარი დამაკავშირებელი რგოლია. სომხეთთან ერთად, ამ პროექტში სხვა ქვეყნებიც არიან ჩართულნი და ჩვენ განვიხილავთ ირანის, სომხეთის, საქართველოსა და რუსეთის დამაკავშირებელი პროექტის ექსპლუატაციაში გაშვების შესაძლებლობას“. ორი ქვეყნის ერთობლივი შეხვედრის სხვა მიზნებზე საუბრისას, ენერგეტიკის მინისტრმა აღნიშნა: „კიდევ ერთი მნიშვნელოვანი საკითხია ენერგეტიკული თანამშრომლობის განვითარება. ირანი მრავალი წელია სომხეთში გაზის ექსპორტს ახორციელებს და სანაცვლოდ ელექტროენერგიას იღებს. ამ თანამშრომლობის განვითარება დიდი ხანია დღის წესრიგში დგას და ამისათვის აუცილებელია ახალი ელექტროგადამცემი ხაზის აშენება.
ეს პროექტი ამჟამად ხორციელდება. სომეხი მინისტრის ვიზიტის დროს მოლაპარაკებები მიმდინარეობდა მისი განხორციელების პროცესის დაჩქარებაზე, რათა ის უფრო მოკლე დროში დასრულდეს. განხილვის კიდევ ერთი თემა იყო მდინარე არაქსზე ერთობლივი პროექტი. ამ მდინარეს აქვს ჰიდროენერგეტიკის შესაბამისი პოტენციალი და არსებობს შესაძლებლობა, აშენდეს დაახლოებით 200 მეგავატი სიმძლავრის ელექტროსადგური. ამ პროექტის კვლევები უკვე სრულად დასრულდა და ახლა აუცილებელია მისი დაფინანსებისა და განხორციელების ეტაპების განსაზღვრა.“
ირანის ისლამურ რესპუბლიკასა და სომხეთის რესპუბლიკას შორის ენერგეტიკული თანამშრომლობა ძალიან მაღალ დონეზეა. ენერგეტიკის სექტორში, ორ ქვეყანას შორის გაზისა და ელექტროენერგიის გაცვლა მრავალი წელია ხორციელდება და სომხეთის რესპუბლიკას აქვს შესაძლებლობა, მთელი წლის განმავლობაში ირანში ელექტროენერგიის ექსპორტირება მოახდინოს და სანაცვლოდ გაზი მიიღოს.
შეხვედრაზე ეს საკითხიც განიხილეს. გარდა ამისა, განიხილეს ორმხრივი თანამშრომლობის განვითარებისა და ორი ქვეყნის ენერგეტიკული ინფრასტრუქტურის დაკავშირების შესაძლებლობები. ერთ-ერთი უმნიშვნელოვანესი ერთობლივი პროექტია 400 კვ-იანი ელექტროგადამცემი ხაზი, რომელიც ამჟამად განხორციელების პროცესშია. რა თქმა უნდა, ამ პროექტის განხორციელებისას არის გარკვეული პრობლემები და დაბრკოლებები, რომლებიც განიხილეს. ვიმედოვნებთ, რომ ეს პროექტი წლის ბოლომდე ამოქმედდება“, – აღნიშნა ირანელმა მინისტრმა.
