ჩვენი პოზიცია არ შეცვლილა: ჩვენ რეგიონში სასაზღვრო და გეოპოლიტიკური ცვლილებების წინააღმდეგი ვართ. საზღვრების შეცვლა ჩვენთვის წითელი ხაზია, ეს გამოცხადდა ირანის უმაღლესი ხელისუფლების დონეზე და ამის წინააღმდეგ ვერავინ გამოვა. ამის შესახებ საზოგადოებრივი ტელევიზიისთვის მიცემულ ინტერვიუში განაცხადა ირანის ისლამური რესპუბლიკის საგანგებო და სრულუფლებიანმა ელჩმა სომხეთში მეჰდი სობჰანიმ.
ელჩმა ხაზგასმით აღნიშნა, რომ სხვა ქვეყნის ტერიტორიაზე ექსტრატერიტორიული დერეფნის შექმნას აზრი არ აქვს და თითოეული ქვეყნის საკომუნიკაციო არხები სახელმწიფოს ხელშია, რომელიც ახორციელებს თავის სუვერენიტეტს ამ ტერიტორიაზე.
„მე ვფიქრობ, რომ სომხეთის ტერიტორიაზე ექსტრატერიტორიული დერეფნის საკითხის განხილვას არავითარი კავშირი არ აქვს საერთაშორისო სამართალთან, ქვეყნების ტერიტორიულ მთლიანობასთან და ეროვნულ სუვერენიტეტთან. როგორც სომხეთის პრემიერ-მინისტრის პროგრამაში „მშვიდობის გზაჯვარედინი“ ნათქვამია, სომხეთის ტერიტორიაზე ნებისმიერი ტერიტორიული კავშირი უნდა მოქმედებდეს ამ ქვეყნის ეროვნული სუვერენიტეტის ქვეშ. არიან თუ არა მზად ქვეყნები, რომლებიც სომხეთის ტერიტორიაზე ექსტრატერიტორიულ დერეფანზე საუბრობენ, თავიანთ ტერიტორიაზე შექმნან ასეთი ექსტრატერიტორიული დერეფნები? ვფიქრობ, პასუხი უარყოფითია. ამიტომ რაც არ სურთ საკუთარი თავისთვის, არც სხვისთვის უნდა უნდოდეთ“, – განაცხადა ირანის ელჩმა.
