სომხეთის პრემიერ-მინისტრმა ნიკოლ ფაშინიანმა საქართველოს პრემიერ-მინისტრ ირაკლი კობახიძეს ეროვნულ დღესასწაულთან, სახელმწიფოებრივი დამოუკიდებლობის აღდგენის დღესთან დაკავშირებით მილოცვის წერილი გაუგზავნა.
Armenpress-ის ინფორმაციით, სომხეთის პრემიერ-მინისტრის ადმინისტრაციის მიერ გავრცელებულ მილოცვაში ნათქვამია:
„გულითადად გილოცავთ თქვენ და მოძმე საქართველოს ხალხს საქართველოს ეროვნულ დღესასწაულს, სახელმწიფოებრივი დამოუკიდებლობის აღდგენის დღეს.
საქართველოსთან ურთიერთობების განვითარება სომხეთის საგარეო პოლიტიკის პრიორიტეტს წარმოადგენს. ბოლო წლებში სომხეთ-საქართველოს ურთიერთობებში სხვადასხვა სფეროში მიღწეული წარმატებები ურთიერთშეთანხმებისა და ერთობლივი, უწყვეტი ძალისხმევის შედეგია უმაღლეს და უწყებათაშორის დონეზე, რამაც ხელი შეუწყო ორმხრივი ურთიერთობების ხარისხობრივად ახალ — სტრატეგიული პარტნიორობის დონემდე ამაღლებას.
დიდად ვაფასებთ მეგობარი საქართველოს მხარდაჭერას სომხეთის მთავრობის მიერ წარდგენილ „მშვიდობის გზაჯვარედინის“ პროექტის მიმართ, რომელიც მიზნად ისახავს რეგიონულ ქვეყნებს შორის კავშირისა და თანამშრომლობის ხელშეწყობას, ასევე იმ ნაბიჯებს, რომელსაც საქართველო დგამს სომხეთ-აზერბაიჯანის ურთიერთობების დარეგულირების პროცესის მხარდასაჭერად.
კიდევ ერთხელ გილოცავთ დამოუკიდებლობის დღეს და გისურვებთ თქვენ და თქვენს ქვეყანას კეთილდღეობას, მშვიდობასა და ახალ წარმატებებს“.
