სომხეთის მთავრობა იწყებს დსს „სომხეთის ელექტროქსელების“ მართვის გადაბარების პროცესს.
Armenpress-ის ცნობით, ამის შესახებ სომხეთის რესპუბლიკის პრემიერ-მინისტრმა ნიკოლ ფაშინიანმა მთავრობის სხდომაზე განაცხადა.
„ცხადია, რომ სახელმწიფომ ძალიან სწრაფად უნდა დაიწყოს დსს „სომხეთის ელექტროქსელების“ მართვა და განახორციელოს შემდგომი პროცესები ნაციონალიზაციისა და კომპანიის მართვის ეფექტურობის გაზრდის მიმართულებით. ჩვენ ეს სწრაფად და ეფექტურად უნდა განვახორციელოთ“, – აღნიშნა ფაშინიანმა.
ამ კონტექსტში, პრემიერ-მინისტრმა ასევე ახსენა 25 ივნისს მომხდარი ინციდენტი, როდესაც „Homplex Mall“-ის გახსნის ცერემონიაზე ელექტროენერგიის გათიშვა მოხდა.
„ხალხმა 70 მილიონი დოლარი ჩადო და ვერ ახერხებს ნორმალური გახსნის ცერემონიის ჩატარებას. აქ ორი ვარიანტია: ან ეს არის სპეციალური საბოტაჟი, ან სისტემა ტექნიკურად უვარგისია. ორივე შემთხვევაში, მათ ყველა ზღვარი გადალახეს“, – ხაზგასმით აღნიშნა ფაშინიანმა.
პრემიერ-მინისტრმა აღნიშნა, რომ ეს საკითხი პოლიტიკურ დონეზე განიხილეს, სომხეთის ,,სამოქალაქო ხელშეკრულების“ პარტიის მმართველობასა და ეროვნული კრების ფრაქციის ფარგლებში. მთავრობამ უკვე მოამზადა შესაბამისი საკანონმდებლო ინიციატივები.
მან აღნიშნა, რომ დაგეგმილია, რომ პირველი აუცილებელი ნაბიჯი სახელმწიფო მართვის აღება იქნება, რის შემდეგაც განხილული იქნება შესაძლო სცენარები კომპანიის სრული ნაციონალიზაციის, მართვის რეფორმებისა და ეფექტურობის გაზრდის მიმართულებით.
ფაშინიანმა ხაზგასმით აღნიშნა, რომ მთავრობის სტრატეგიული მიზანია მომავალში ასევე უზრუნველყოს ,,სომხეთის ელექტროქსელების“ აქციების თავისუფალი შეძენის შესაძლებლობა, რათა სომხეთის მოქალაქეებმა შეძლონ კომპანიის თანამფლობელები გახდნენ.
„ჩვენ უნდა უზრუნველვყოთ ისეთი გარანტიები, რომ სომხეთის მოქალაქეებს ჰქონდეთ შესაძლებლობა შეიძინონ აქციები თავიანთი დანაზოგით. მსგავსი სტრატეგიული მიზანი გვაქვს ზანგეზურის სპილენძ-მოლიბდენის კომბინატის შემთხვევაშიც“, – აღნიშნა პრემიერ-მინისტრმა.
