სომხეთის რესპუბლიკის ტერიტორიული მართვისა და ინფრასტრუქტურების მინისტრმა, დავით ხუდათიანმა, უპასუხა თურქეთის ტრანსპორტისა და ინფრასტრუქტურის მინისტრის განცხადებას, რომლის მიხედვითაც, ე.წ. „ზანგეზურის დერეფანი“ გააძლიერებს თურქეთის, სომხეთისა და აზერბაიჯანის ეკონომიკურ თანამშრომლობას.
Armenpress-ის შეკითხვაზე ხუდათიანმა საკითხის გარშემო ისაუბრა.
კითხვა: ბატონო ხუდათიან, თურქეთის ტრანსპორტისა და ინფრასტრუქტურის მინისტრმა ყარს-დილიჯუს სარკინიგზო ხაზის საძირკვლის ჩაყრის ცერემონიაზე ისაუბრა იმაზე, რომ ე.წ. „ზანგეზურის დერეფანი“ გააძლიერებს თურქეთის, სომხეთისა და აზერბაიჯანის ეკონომიკურ თანამშრომლობას. როგორ შეაფასებდით ამ განცხადებას?
პასუხი: სომხეთის რესპუბლიკის ტერიტორიაზე შეუძლიათ იმუშაონ და განხორციელდნენ მხოლოდ ისეთი ინფრასტრუქტურული პროექტები, რომლებიც სომხეთის რესპუბლიკის მთავრობის მიერაა შემოთავაზებული, მიღებული ან დამტკიცებული. ასეთი პროექტებია, მაგალითად: „ჩრდილოეთი-სამხრეთი“, „მშვიდობის გზაჯვარედინი“, TRIPP პროგრამები. აღნიშნული კრიტერიუმის შეუსაბამო სახელწოდებით ინფრასტრუქტურული პროექტები სომხეთის რესპუბლიკის ტერიტორიაზე არ იმუშავებს. რაც შეეხება თურქეთს, სომხეთსა და აზერბაიჯანს შორის ეკონომიკურ თანამშრომლობას, სომხეთის რესპუბლიკა მზადაა და დაინტერესებულია ამით. თანამშრომლობის სატრანსპორტო კომპონენტი ასახულია სწორედ პროექტში „მშვიდობის გზაჯვარედინი“, რომლის ნაწილია TRIPP-იც – პროგრამა „ტრამპის მარშრუტი საერთაშორისო მშვიდობისა და კეთილდღეობისათვის“. ჩვენ აქტიურად ვემზადებით ამ პროექტის განხორციელების დაწყებისათვის და აზერბაიჯანთან სატრანსპორტო კომუნიკაციების გასახსნელად, 8 აგვისტოს ვაშინგტონში მიღებული დეკლარაციის შესაბამისად, რომელსაც სომხეთის რესპუბლიკის პრემიერ-მინისტრმა, აზერბაიჯანის პრეზიდენტმა და აშშ-ის პრეზიდენტმა მოაწერეს ხელი. საჭიროდ მიგვაჩნია აღვნიშნოთ, რომ საჯაროდ გამოვხატეთ მზადყოფნა, ასევე, გავხსნათ გიუმრი-ყარსის სარკინიგზო კავშირი სომხეთსა და თურქეთს შორის, რაც კიდევ უფრო გააძლიერებს რეგიონულ ურთიერთკავშირებს.
