TRIPP არ არის მხოლოდ აზერბაიჯან-ნახიჩევანის კავშირი, ეს არის რეგიონალური სტრატეგიული პროექტი – სომხეთის საგარეო საქმეთა მინისტრის მოადგილე
TRIPP პროექტს გაცილებით ფართო სტრატეგიული მნიშვნელობა აქვს და არ შემოიფარგლება მხოლოდ აზერბაიჯანსა და ნახიჩევანს შორის კავშირით.
„Armenpress“-ის ცნობით, მსოფლიო პოლიტიკის ფორუმის ფარგლებში, სომხეთის საგარეო საქმეთა მინისტრის მოადგილემ, ვაჰან კოსტანიანმა, TRIPP პროექტსა და სომხეთ-აზერბაიჯანის ურთიერთობებზე ისაუბრა.
კოსტანიანმა აღნიშნა, რომ TRIPP პროექტის მხარდაჭერის ფორმულირება სრულიად ზუსტი არ არის.
„TRIPP პროექტის მხარდაჭერა, ალბათ, არ არის ვაშინგტონში მიღწეული შეთანხმებების ყველაზე ზუსტი აღწერა, რადგან, პირველ რიგში, TRIPP არის პროექტი, რომლის სრული მფლობელიც სომხეთია და მეორეც, ჩვენ თვითონ ძალიან დაინტერესებულები ვართ რეგიონში კომუნიკაციების გახსნით“, – თქვა მან.
მისი თქმით, პროექტს გაცილებით ფართო სტრატეგიული მნიშვნელობა აქვს.
„TRIPP არ არის მხოლოდ აზერბაიჯანის ძირითად ნაწილსა და ნახიჩევანს შორის კავშირი; ეს არის ბევრად უფრო დიდი და სტრატეგიული პროექტი ცენტრალური აზიის ევროპასთან დასაკავშირებლად, ასევე ორმხრივი სარგებლის უზრუნველყოფისადმი ვალდებულების გასაგებად“, – აღნიშნა კოსტანიანმა.
მან ხაზი გაუსვა, რომ განბლოკვის შედეგად, სომხეთს საშუალება მიეცემა საკუთარი ტერიტორიის სხვადასხვა ნაწილი ურთიერთს დაუკავშიროს.
„ეს პრაქტიკაში ასევე ნიშნავს, რომ სომხეთის სამხრეთი ნაწილი შეიძლება დაუკავშირდეს ჩრდილოეთ ნაწილს ნახიჩევანის რკინიგზის გამოყენებით“, – თქვა მან და დასძინა, რომ ეს პროცესი შესაძლებელს გახდის აღმოსავლეთის დასავლეთთან, ასევე ყურის შავ ზღვასთან დაკავშირებას.
კოსტანიანის თქმით, სომხეთი დაინტერესებულია პროექტის განხორციელებით და აქტიურ დისკუსიებს აწარმოებს ამერიკულ მხარესთან.
„მიმდინარეობს აქტიური დისკუსიები ამერიკელ პარტნიორებთან იმის შესახებ, თუ როგორ ვაპირებთ სომხეთში სომხურ-ამერიკული ერთობლივი საწარმოს შექმნას“, – აღნიშნა მან.
მან ასევე ხაზი გაუსვა, რომ უკვე არსებობს რეგიონული თანამშრომლობის პრაქტიკული მაგალითები.
„ჩვენ უკვე დავიწყეთ არა მხოლოდ ტექნიკურ-ეკონომიკური კვლევის ჩატარება, არამედ თავად რეგიონში კომუნიკაციების გახსნაც, რადგან, მაგალითად, 8 აგვისტოს შემდეგ, გვაქვს ყაზახეთიდან მარცვლეულის იმპორტის პრეცედენტი აზერბაიჯანისა და საქართველოს რკინიგზის სისტემებით“, – თქვა კოსტანიანმა და ეს თანამშრომლობის ეფექტურ მაგალითად შეაფასა.
სომხეთი-აზერბაიჯანის ურთიერთობებზე საუბრისას, კოსტანიანმა აღნიშნა, რომ მხარეები მშვიდობის დამყარებაზე საუბრობენ. „ორივე ქვეყნის ლიდერებმა არაერთხელ განაცხადეს, რომ სომხეთსა და აზერბაიჯანს შორის მშვიდობა უკვე დამყარებულია და ჩვენ მირჩევნია, რომ ამჟამად მიმდინარე პროცესებს მშვიდობის ინსტიტუციონალიზაცია ვუწოდოთ“, – თქვა მან.
მისი თქმით, ამ პროცესის ფარგლებში ეკონომიკური და სხვა ნაბიჯები იდგმება. „ჩვენ უკვე დავიწყეთ ორმხრივი პირდაპირი ვაჭრობა აზერბაიჯანიდან საწვავის იმპორტით და ვიმედოვნებთ, რომ ესეც უახლოეს მომავალში მოხდება; უკვე განვმარტეთ, რას გავატარებთ ექსპორტზე სომხეთიდან აზერბაიჯანში“, – აღნიშნა კოსტანიანმა.
მან დასძინა, რომ ასევე მიმდინარეობს მუშაობა საზოგადოებებს შორის კონტაქტებზე. „ორგანიზებულია შეხვედრები სამოქალაქო საზოგადოების წარმომადგენლებს შორის“, – თქვა მან და ხაზი გაუსვა, რომ ეს შეხვედრები ტარდება როგორც საზღვარგარეთ, ასევე სომხეთსა და აზერბაიჯანში. კოსტანიანმა ასევე ხაზი გაუსვა რეგიონული თანამშრომლობის ახალი ფორმატების მნიშვნელობას.
„ჩვენ ასევე გვაქვს ძალიან მნიშვნელოვანი ფორმატი, რომელიც ჩამოყალიბდა ჩვენს ქართველ პარტნიორებთან საგარეო საქმეთა სამინისტროებს შორის სამმხრივი კონსულტაციების სახით“, – აღნიშნა მან.
საგარეო საქმეთა მინისტრის მოადგილის თქმით, რეგიონში თანამშრომლობის პერსპექტივები ფართოა.
„ჩვენ ვხედავთ დიდ პერსპექტივებს რეგიონული თანამშრომლობისთვის არა მხოლოდ სომხეთს, საქართველოსა და აზერბაიჯანს შორის, არამედ ჩვენს უფრო ფართო სამეზობლოსთანაც“, – დაასკვნა კოსტანიანმა.
