სომხეთის პრემიერ-მინისტრი ნიკოლ ფაშინიანი მონაწილეობას მიიღებს ირანის ყოფილი უზენაესი ლიდერის, აიათოლა ალი ხამენეის გამოსამშვიდობებელ ცერემონიაში. ირანული მედიის ცნობით, ამის შესახებ სააგენტო ISNA-ს განუცხადა სომეხმა პარლამენტის წევრმა არა შაჰვერდიანმა.
„ბატონ ფურმოჰამადისა და ჩემს შეხვედრაზე, რომელიც ბატონ ფაშინიანთან სომხეთში ვიზიტის დროს გვქონდა, მან გამოაცხადა მზადყოფნა, მონაწილეობა მიეღო რევოლუციის მოწამე ლიდერის დაკრძალვის ცერემონიაში. სომხური თემი თითქმის პირველი თემი იყო ირანში, რომელმაც 19 აპრილს მოწამე იმამის დაკრძალვის ცერემონია მოაწყო. ეს ცერემონია ცეცხლის შეწყვეტის დღეს დაემთხვა. თუმცა, ამ ცერემონიის ჩატარება წინასწარ გვქონდა დაგეგმილი“, – თქვა მან.
მან აღნიშნა, რომ „სომხურ თემს დაკრძალვის ცერემონიისთვის ცალკე პროგრამა არ აქვს. თემის წარმომადგენლებიც მიიღებენ მონაწილეობას გამოცხადებულ ცერემონიებში“. სომხეთის პრემიერ-მინისტრის, ნიკოლ ფაშინიანის, ცერემონიაზე დასწრებაზე საუბრისას, შაჰვერდიანმა აღნიშნა: „ირან-სომხეთის საპარლამენტო მეგობრობის ჯგუფის ხელმძღვანელის რანგში ჩემი და ირან-სომხეთის ერთობლივი ეკონომიკური დელეგაციის ხელმძღვანელის რანგში დოქტორ პურმოჰამადის სომხეთში ვიზიტის დროს, სომხეთის პრემიერ-მინისტრთან და მის მოადგილესთან ორმხრივი შეხვედრის დროს, მათ განაცხადეს, რომ ცერემონიაში მონაწილეობას მიიღებენ“.
სომხეთის პრემიერ-მინისტრის ადმინისტრაციამ თეირანში ვიზიტის შესახებ ინფორმაციაზე კომენტარი არ გააკეთა. ფაშინიანის პრესმდივანმა ნაზელი ბაღდასარიანმა Factor TV-ს განუცხადა, რომ „პრემიერ-მინისტრის ქმედებების შესახებ ინფორმაცია სათანადო ფორმით გამოქვეყნდება“. მედიის ცნობით, ალი ხამენეის ხსოვნისადმი მიძღვნილი მსახურება თეირანში შაბათს და კვირას მოსალას სალოცავ კომპლექსში დაიწყება, რომელიც ქალაქის მთავარი ადგილია სახელმწიფო რელიგიური შეკრებებისთვის. 7 ივლისს, მსვლელობა ყუმში გადაინაცვლებს, ირანში შიიტური თეოლოგიის ცენტრში და მსოფლიოში ყველაზე მნიშვნელოვან შიიტურ სემინარიაში. ხამენეის ცხედარს 9 ივლისს მის მშობლიურ ქალაქ მაშჰადში დაკრძალავენ.
