კვლევითი ინიციატივა სომხეთის წინააღმდეგ რუსეთის ახალ დეზინფორმაციულ თავდასხმას ამხელს

კვლევითმა ინიციატივამ, რომელიც რუსული დეზინფორმაციული კამპანიების გამოაშკარავებით არის დაკავებული, გამოავლინა Storm-1516 ჯგუფის ახალი თავდასხმა სომხეთის წინააღმდეგ. Armenpress-ის ცნობით, მედიაექსპერტმა არტურ პაპიანმა ამის შესახებ თავის Facebook გვერდზე დაწერა. მისი თქმით, თავდასხმა თურქულენოვან ODATV მედიასაშუალებაში გამოქვეყნებული სტატიით დაიწყო, რომელშიც ნათქვამია, რომ პრემიერ-მინისტრი ნიკოლ ფაშინიანი სიუნიქის მახლობლად 1200 კვადრატული კილომეტრის ფართობის აზერბაიჯანისთვის გადაცემას, ასევე მარგარას საკონტროლო პუნქტთან ახლოს ტერიტორიის თურქეთისთვის გამოყოფას ემზადება. Gnida Project-ის თანახმად, ODATV ადრეც მონაწილეობდა რუსულ დეზინფორმაციულ კამპანიებში, მათ შორის უკრაინის წინააღმდეგ. პაპიანის თქმით, თავდასხმის შემდეგი ეტაპი X პლატფორმაზე გადავიდა, რაც Storm-1516-ის მიღებულ ტაქტიკას წარმოადგენს. „აქ რამდენიმე ანონიმური ანგარიში ავრცელებს ინგლისურენოვან ვიდეოს, რომელიც იგივე დებულებებს იმეორებს. X ანგარიშის სახელწოდებები ძირითადად ინგლისურია, ზოგი საინფორმაციო ვებსაიტების სახელწოდებას ჰგავს, ზოგი კი შეიცავს მემარჯვენე-კონსერვატიულ წრეებში მიღებულ ფორმულირებებს: პატრიოტი, სიმართლე. რამდენიმე შემთხვევაში, სახელწოდების გვერდით რუსეთის და/ან აშშ-ის დროშებს ვხვდებით“, – წერს პაპიანი. მანამდე, ინფორმაცია იმის შესახებ, რომ სომხეთის პრემიერ-მინისტრი, სავარაუდოდ, სიუნიქის რეგიონიდან ტერიტორიის აზერბაიჯანისთვის, ხოლო მარგარას რეგიონიდან თურქეთისთვის გამოყოფას ემზადება, უარყო სომხეთის რესპუბლიკის პრემიერ-მინისტრის პრესმდივანმა ნაზელი ბაღდასარიანმა.