თავდაცვის სამინისტროს ვაზგენ სარგსიანის სამხედრო აკადემია და ეროვნული თავდაცვის კვლევითი უნივერსიტეტი ევროპის უსაფრთხოებისა და თავდაცვის კოლეჯის ასოცირებული პარტნიორები გახდნენ. Armenpess-ის ცნობით, ამის შესახებ თავის Facebook გვერდზე გამოქვეყნებულ პოსტში განაცხადა სომხეთის თავდაცვის მინისტრმა სურენ პაპიკიანმა.
„20 ივლისიდან, თავდაცვის სამინისტროს ვაზგენ სარგსიანის სამხედრო აკადემია და თავდაცვის სამინისტროს ეროვნული თავდაცვის კვლევითი უნივერსიტეტი ევროპის უსაფრთხოებისა და თავდაცვის კოლეჯის დიდ ოჯახს შეუერთდნენ, როგორც დაწესებულების ასოცირებული პარტნიორები“, – დაწერა მინისტრმა.
ამ თემაზე განცხადება ასევე გაავრცელა სომხეთის თავდაცვის სამინისტრომ.
„ევროპის უსაფრთხოებისა და თავდაცვის კოლეჯის აღმასრულებელი აკადემიური საბჭოს 11 ივნისის წინადადების საფუძველზე, კოლეჯის სამეთვალყურეო კომიტეტმა 3 ივლისს ერთხმად დაამტკიცა თავდაცვის სამინისტროს ვაზგენ სარგსიანის სახელობის სამხედრო აკადემიისა და თავდაცვის სამინისტროს ვაზგენ სარგსიანის სახელობის ეროვნული თავდაცვის კვლევითი უნივერსიტეტის კანდიდატურები, კოლეჯს ასოცირებული პარტნიორის სტატუსი მიანიჭა. შემდეგ, საკითხი დუმილის პროცედურით დასამტკიცებლად ევროკავშირის წევრ სახელმწიფოებს წარედგინა. შეგახსენებთ, რომ ადრე, 10-11 ივნისს, სომხეთის რესპუბლიკის შეიარაღებული ძალების გენერალური შტაბის უფროსის მოადგილის, გენერალ-მაიორ არტურ იეროიანის ხელმძღვანელობით დელეგაციამ მონაწილეობა მიიღო ევროპის უსაფრთხოებისა და თავდაცვის კოლეჯის აღმასრულებელი აკადემიური საბჭოს შეხვედრაში ბრიუსელში, ევროკომისიის შტაბ-ბინაში, რომლის დროსაც განიხილეს წინადადება თავდაცვის სამინისტროს ეროვნული თავდაცვის კვლევითი უნივერსიტეტისა და ვაზგენ სარგსიანის სახელობის სამხედრო აკადემიისთვის კოლეჯის ასოცირებული პარტნიორის სტატუსის მინიჭების შესახებ“, – ნათქვამია განცხადებაში.
