გერმანული საზოგადოებრივი მედია კომპანია „დოიჩე ველე“ (DW) 3 აგვისტოდან სოციალურ მედიაში ახალ ქართულენოვან ჟურნალისტურ პროექტს დაიწყებს. ინიციატივა ევროკავშირის „ევროპული საინფორმაციო ფარის“ პროგრამის დაფინანსებით ხორციელდება, რომელიც ასევე მოიცავს სომხური და აზერბაიჯანული მედია პროექტების შექმნას. ახალი პროექტი Instagram-ზე იმუშავებს და განკუთვნილია საქართველოსა და სამხრეთ კავკასიაში ქართულენოვანი აუდიტორიისთვის. DW-ს ქართული რედაქციის გუნდი გააშუქებს როგორც ქვეყნის შიდა დღის წესრიგს, ასევე მნიშვნელოვან საერთაშორისო თემებს. მომავალში პროექტის სხვა პლატფორმებზე გაფართოება იგეგმება. ქართული პროექტის დაწყება შესაძლებელი გახდა ევროკავშირის „ევროპული საინფორმაციო ფარის“ ინიციატივის დაფინანსების წყალობით. პროექტის მიზანია დამოუკიდებელი ჟურნალისტიკის მხარდაჭერა და დეზინფორმაციის წინააღმდეგ ბრძოლა ევროკავშირისთვის სტრატეგიული მნიშვნელობის რეგიონებში. DW-ს ქართული პროექტი 3 აგვისტოს დაიწყება. ამავე ინიციატივით დაფინანსებული, ფრანგული „ფრანს მედიის მონდე“ (FMM) და პოლონური საერთაშორისო მაუწყებელი „TVP World“ ასევე შექმნიან ჟურნალისტურ პროექტებს სომხურ და აზერბაიჯანულ ენებზე. სამხრეთ კავკასიისთვის განკუთვნილი სამი პროექტი ერთმანეთთან ითანამშრომლებს და რეგულარულად გაცვლის კონტენტს. დაფინანსება ამჟამად 18 თვის განმავლობაშია დაგეგმილი. DW-ს გენერალურმა დირექტორმა, ბარბარა მასინგმა, აღნიშნა, რომ დამოუკიდებელი ჟურნალისტიკა დემოკრატიისა და პოლიტიკური მონაწილეობის მთავარი კომპონენტია. მისი თქმით, France Médias Monde-სა და TVP World-თან პარტნიორობა გააძლიერებს ევროპის მხარდაჭერას თავისუფალი პრესისა და სანდო ინფორმაციის მიმართ რეგიონში, რომელიც, მისი აზრით, დეზინფორმაციული კამპანიების სამიზნეა და განსაკუთრებული პოლიტიკური და საზოგადოებრივი გამოწვევების წინაშე დგას.
