საქართველოს ხელისუფლება 2-3 თვეა მუშაობს სომხეთსა და აზერბაიჯანს შორის შეთანხმების მისაღწევად. „ალიქ მედიის“ ცნობით, ამის შესახებ საქართველოს ვიცე-პრემიერმა, საგარეო საქმეთა მინისტრმა დავით ზალკალიანმა განაცხადა.
აზერბაიჯანმა 15 ტყვედ ჩავარდნილი ჯარისკაცი გადასცა სომხეთს ყარაბაღის აკნას (აღდამის) რეგიონში ნაღმიანი მინდვრების რუკების სანაცვლოდ. გარიგების პირობები შეათანხმეს საქართველოს პრემიერ-მინისტრის ირაკლი ღარიბაშვილის აქტიური შუამავლობით. პროცესში მონაწილეობდა აშშ – ს სახელმწიფო მდივნის მოვალეობის შემსრულებელი ევროპასა და ევრაზიაში ფილიპ რიკერი.
”ბოლო 2-3 თვის განმავლობაში ჩვენ ძალიან აქტიურები ვიყავით ჩვენს მთავარ სტრატეგიულ პარტნიორთან ამ შედეგის მისაღწევად. ძალიან მოხარული ვარ, რომ დღეს ასეთი შედეგი გვაქვს, მინდა კიდევ ერთხელ მადლობა გადავუხადო, პირველ რიგში, ჩვენს სტრატეგიულ პარტნიორებს, აზერბაიჯანს და სომხეთს, რომლებმაც კარგად გააცნობიერეს, რომ აუცილებელია ნაბიჯების გადადგმა ორმხრივი მშვიდობისა და სტაბილურობის დამყარების მიზნით რეგიონში“, – თქვა ზალკალიანმა.
6 ივნისს რიკერი ჩამოვიდა საქართველოში, რათა ოფიციალურად დაიწყოს სამხრეთ კავკასიის ტური. ზალკალიანმა ხაზი გაუსვა, რომ ამერიკული დელეგაცია დაბრუნდა თბილისში, ბაქოში და ერევანში შეხვედრების შემდეგ საკითხის განხილვის გასაგრძელებლად.
საქართველოს საგარეო საქმეთა მინისტრი იმედოვნებს, რომ თანამშრომლობის შედეგად მიღებული გამოცდილება საფუძველი იქნება ახალი ჰუმანიტარული და სხვა მნიშვნელოვანი საკითხების გადაჭრის ახალი ფორმატის შესაქმნელად.
