საქართველოს იუსტიციის სამინისტრომ ყოფილი პრეზიდენტის მიხეილ სააკაშვილის ციხიდან კერძო კლინიკა Vivamed-ში სამედიცინო გამოკვლევების ჩასატარებლად გადაყვანა გადაწყვიტა. ამის შესახებ იუსტიციის სამინისტროს ხელმძღვანელმა რატი ბრეგაძემ დღეს გამართულ ბრიფინგზე თქვა.
„ჩვენ, როგორც პასუხისმგებელი სახელმწიფო, ყოველთვის ვმოქმედებთ ნებისმიერი ადამიანის ჯანმრთელობისა და სიცოცხლის ინტერესებიდან გამომდინარე. შესაბამისად, როგორც ნებისმიერი სხვა პატიმრის შემთხვევაში, შესაძლო გართულებების თავიდან აცილების მიზნით, მიხეილ სააკაშვილს შესთავაზებენ გადაყვანას კლინიკა „ვივამედში“, სადაც ჩაუტარდება გამოკვლევა და მკურნალობა“, – განაცხადა ბრეგაძემ. მან დასძინა, რომ გადაწყვეტილება მიღებულ იქნა იმის გამო, რომ სააკაშვილმა ნაწილობრივ უარი თქვა ციხეში მკურნალობაზე და ასევე შერჩევით ჭამაზე.
