ევროპის საბჭოს გენერალურმა მდივანმა, მარია პეიცინოვიჩ ბურიჩმა წერილი გაუგზავნა აზერბაიჯანის საგარეო საქმეთა მინისტრს ჯეიჰუნ ბაირამოვს, სადაც სთხოვს, დეტალური და ზუსტი ინფორმაცია მიაწოდოს აზერბაიჯანის ხელისუფლების მიერ გადადგმულ ნაბიჯებზე აზერბაიჯანელი სამხედროების მიერ სომეხი სამხედრო ტყვეების დახვრეტის ვიდეოსთან დაკავშირებით.
„არმენპრესის“ ცნობით, ბურიჩის წერილი ევროსაბჭოს ვებგვერდზე გამოქვეყნდა.
„ბოლო დროს მიღებული საგანგაშო და საშინელი ცნობების გათვალისწინებით, ვალდებული ვარ თქვენი სამინისტროსგან მოვითხოვო დეტალური და ზუსტი ინფორმაცია აზერბაიჯანის ხელისუფლების მიერ მიღებული ზომების შესახებ ადამიანის უფლებათა ევროპული კონვენციის მე-2 და მე-3 მუხლების ბრალდებებთან დაკავშირებით. ნათქვამია წერილში.
ბურიჩმა დასძინა, რომ ის გულისხმობს ბოლო ვიდეოებს, რომლებიც სავარაუდოდ შეიცავს სომეხი სამხედრო ტყვეების მიმართ ძალადობის კადრებს, მათ შორის სასამართლოს გარეშე მკვლელობებს.
„გთხოვთ, გაითვალისწინოთ, რომ ევროპის საბჭო, ადამიანის უფლებათა ევროპული კონვენციის მანდატის შესაბამისად, იქნება თანმიმდევრული ამ საკითხში, რათა უზრუნველყოს ორგანიზაციის სტანდარტების სრული პატივისცემა“, – ნათქვამია წერილში.
ბურიჩმა გაიხსენა მისი წინა განცხადებები, რომ ევროპის საბჭოს წევრ ქვეყნებს შორის არსებული უთანხმოება მშვიდობიანი მოლაპარაკებების გზით უნდა მოგვარდეს. „პირდაპირი კონტაქტები თქვენს ქვეყანასა და სომხეთს შორის უმაღლესი მენეჯმენტის დონეზე პერსპექტიულია და უნდა გაგრძელდეს“, – განაცხადა ევროპის საბჭოს გენერალურმა მდივანმა.
