მოითხოვეთ თქვენი პრეზიდენტის მიერ ნაკისრი ვალდებულებების შესრულება – აზერბაიჯანელი დელეგატის ცრუ თეზისებს ხაჟაკიანი გამოეხმაურა
ევროპის საბჭოს ადგილობრივ და ტერიტორიულ ხელისუფლებათა კონგრესის 44-ე მორიგი სესიის დროს პარტია „ნათელი სომხეთის“ მმართველი საბჭოს წევრი დავით ხაჟაკიანი გამოეხმაურა აზერბაიჯანელი დელეგატის ჰუმბატ ჰუსეინოვის ცრუ თეზისებს, სადაც მან ისაუბრა წარსულში სომხეთიდან თითქოსდა დევნილი აზერბაიჯანელების უფლებების შესახებ. ცნობას armenpress.am-ი აქვეყნებს.
აზერბაიჯანელი დელეგატის განცხადებებზე საპასუხოდ, მან პირველ რიგში გაიხსენა 2020 წლის 9 ნოემბრის სამმხრივი განცხადების მე-7 პუნქტი, რომლითაც აზერბაიჯანი ვალდებულია უზრუნველყოს იძულებით გადაადგილებულ პირთა და ლტოლვილთა დაბრუნება მთიანი ყარაბაღის ტერიტორიაზე და მიმდებარე რეგიონებში. ხაჟაკიანმა აღნიშნა, რომ აზერბაიჯანული მხარე უარს ამბობს ამ ვალდებულების შესრულებაზე და უარს ამბობს ლტოლვილების შუშში, ჰადრუტში და სხვა რაიონებში დაბრუნებაზე.
„ცოტა ხნის წინ მოვისმინეთ აზერბაიჯანის დელეგატის გამოსვლა, რომელმაც ისაუბრა სომხეთის მხრიდან გარკვეულ მოთხოვნებზე. თქვენ იცით, რომ სომხეთი მზად არის ისაუბროს სამშვიდობო დღის წესრიგზე და ეს ჩვენთვის მნიშვნელოვანია. ბევრი შეთანხმება იყო და შეიძლება ითქვას, რომ მზად ვართ შეთანხმებული დებულებების შესასრულებლად. მაგრამ ახლა, როცა აზერბაიჯანის დელეგატი დევნილების დაბრუნებაზე საუბრობს, უნდა წავიკითხოთ 2020 წლის 9 ნოემბრის განცხადების პუნქტი, რომელსაც ასევე მოაწერა ხელი აზერბაიჯანის პრეზიდენტმა. განცხადების მე-7 პუნქტში ნათქვამია, რომ იძულებით გადაადგილებული პირები და ლტოლვილები ბრუნდებიან მთიანი ყარაბაღის ტერიტორიაზე და მიმდებარე რეგიონებში გაეროს ლტოლვილთა უმაღლესი კომისრის ოფისის ზედამხედველობით, მაგრამ რეალობა სხვაა, რადგან აზერბაიჯანი უარს ამბობს ამ ვალდებულების შესრულებაზე. ისინი უარს ამბობენ ლტოლვილების შუშში, ჰადრუტში და სხვა რაიონებში დაბრუნებაზე და ისინი ამასთან დაკავშირებით საუბრობენ ამ პლატფორმაზე“, – განაცხადა ხაჟაკიანმა.
მან დასძინა, რომ მშვიდობა მხოლოდ მაშინ იქნება შესაძლებელი, როცა თითოეული მხარე თავის მოვალეობებს შეასრულებს. „თქვენ იცით, რომ ლაჩინის დერეფანი დიდი ხანია დაკეტილია და ჩვენ ვნახეთ ევროსაბჭოს საპარლამენტო ასამბლეის იურიდიული და ადამიანის უფლებათა კომიტეტის განცხადება, სადაც ნათქვამია, რომ აზერბაიჯანი ვალდებულია გახსნას დერეფანი, რადგან ეს არის ერთადერთი გზა, რომელიც აკავშირებს მთიან ყარაბაღს სომხეთთან. თუმცა ამას არ აკეთებენ, ჰუმანიტარულ კრიზისს ქმნიან მთიან ყარაბაღში და აქ აკეთებენ განცხადებებს ახალ მოთხოვნებზე. აზერბაიჯანის დელეგატს ვთავაზობ, ისაუბროს თავის პრეზიდენტთან და მოუწოდოს შეასრულოს ყველა ის ვალდებულება, რაც აზერბაიჯანმა 9 ნოემბრის შემდეგ აიღო და განბლოკოს ლაჩინის დერეფანი, რადგან ევროსაბჭოს წევრ ქვეყანას უფლება არ აქვს პოლიტიკური ინტერესებიდან გამომდინარე შექმნას ჰუმანიტარული კრიზისი“, – დაასკვნა ხაჟაკიანმა.
