სომხეთმა ექსპორტი ევრაზიის ეკონომიკური კავშირის ბაზარზე 14-ჯერ გაზარდა. მიხაილ მიშუსტინი
რუსეთის ფედერაციის პრემიერ-მინისტრმა მიხაილ მიშუსტინმა განაცხადა, რომ სომხეთმა 14-ჯერ გაზარდა ექსპორტი ევრაზიის ეკონომიკური კავშირის (EAEU) ბაზარზე, ხოლო ქვეყნის მთლიანი შიდა პროდუქტის ზრდამ 8,5 პროცენტს გადააჭარბა.
ამის შესახებ რუსეთის ფედერაციის პრემიერ-მინისტრმა EAEU-ს 10 წლის იუბილესთან დაკავშირებით ტელეკომპანია Russia-24-ისთვის მიცემულ ინტერვიუში განაცხადა.
მიშუსტინმა აღნიშნა, რომ ხუთივე წევრი ქვეყანა სარგებლობს ევრაზიის ეკონომიკურ კავშირში მონაწილეობით და განმარტა, რომ ეს, პირველ რიგში, შიდა საზღვრებზე საბაჟო კონტროლის არარსებობის შედეგია.
„შეღავათიანი წვდომის წყალობით, ზოგადად, ორმხრივი ვაჭრობის მოცულობები გამრავლდა. მაგალითად, სომხეთმა გაზარდა ექსპორტი საკავშირო ბაზარზე 14-ჯერ, ბელორუსიამ და ყაზახეთმა ორჯერ მეტი, ყირგიზეთმა სამჯერ“, – განაცხადა რუსეთის პრემიერ-მინისტრმა.
მიშუსტინმა ასევე ისაუბრა EAEU-ს წევრი ქვეყნების მთლიანი შიდა პროდუქტების ზრდაზე და განაცხადა, რომ გასული წლის შედეგებმა მსოფლიო მაჩვენებელს გადააჭარბა.
რუსეთის მთავრობის მეთაურმა ასევე გაამახვილა ყურადღება იმაზე, რომ წევრი ქვეყნების – რუსეთის, სომხეთის, ბელორუსიის, ყაზახეთისა და ყირგიზეთის მშპ-ის ზრდის ტემპები უფრო მაღალია, ვიდრე დსთ-ს ქვეყნებში, რომლებიც არ არიან ჩართულნი ასეთ ღრმა ინტეგრაციის ფორმატში.
„გასულ წელს სომხეთის მთლიანი შიდა პროდუქტის ზრდამ 8,5%-ს გადააჭარბა. სამრეწველო წარმოების მოცულობა: 4%. სხვათა შორის, ანალოგიური ვითარებაა ყირგიზეთშიც, სადაც მშპ-ს დინამიკა 2023 წელსაც მაღალი იყო“, – განაცხადა მიშუსტინმა.
