თეირანი პრიორიტეტს მიანიჭებს მეზობლებთან ურთიერთობების განმტკიცებას. ირანის ახლად არჩეული პრეზიდენტი

ირანის ისლამური რესპუბლიკის ახლადარჩეულმა პრეზიდენტმა მასუდ ფეზეშკიანმა სტატიაში სათაურით „ჩემი გზავნილი ახალ სამყაროს“ ხაზგასმით აღნიშნა, რომ თეირანი პრიორიტეტს მიანიჭებს მეზობლებთან ურთიერთობების განმტკიცებას.

Armenpress-ის ცნობით, ირანის ახლადარჩეული პრეზიდენტის მესიჯი Tehran Times-ში გამოქვეყნდა.

გამოქვეყნებულ სტატიაში პრეზიდენტმა ფეზეშკიანმა განაცხადა, რომ ირანი „ძლიერი რეგიონის“ შექმნის მომხრეა და არა რეგიონის, სადაც ერთი ქვეყანა ცდილობს მიაღწიოს დომინანტობას და უპირატესობას სხვაზე.

მან გამოთქვა რწმენა, რომ მეზობელმა და მოძმე სახელმწიფოებმა არ უნდა დახარჯონ თავიანთი ძვირფასი რესურსები დესტრუქციულ კონკურენციაზე, შეიარაღების რბოლაზე და ერთმანეთის არაგონივრულ თავშეკავებაზე. ფეზეშკიანმა ხაზგასმით აღნიშნა, რომ სამაგიეროდ, ირანი შეეცდება შექმნას ისეთი პირობები, რომ რესურსები რეგიონის განვითარებასა და წინსვლას მოხმარდეს ყველას საკეთილდღეოდ.

„ჩვენ მოუთმენლად ველით თანამშრომლობას თურქეთთან, საუდის არაბეთთან, ომანთან, ერაყთან, ბაჰრეინთან, ყატართან, ქუვეითთან, არაბთა გაერთიანებულ საემიროებთან და რეგიონულ ორგანიზაციებთან ჩვენი კავშირების გაღრმავებისა და საერთო პრობლემების გადასაჭრელად“, – აღნიშნა პრეზიდენტმა თავის სტატიაში და დასძინა, რომ მისი ადმინისტრაცია მოუწოდებს, რომ მეზობელმა არაბულმა ქვეყნებმა ითანამშრომლონ და გამოიყენონ ყველა პოლიტიკური და დიპლომატიური ბერკეტი ღაზას სექტორში მუდმივი ცეცხლის შეწყვეტის პრიორიტეტად მისაჩნევად, რათა შეაჩერონ ხოცვა-ჟლეტა და თავიდან აიცილონ კონფლიქტის გავრცელება.

სტატიაში ირანის პრეზიდენტმა ასევე ისაუბრა რუსეთ-უკრაინის კონფლიქტზე და აღნიშნა, რომ თეირანი ცდილობს მშვიდობის მიღწევას რუსეთისა და უკრაინის ხალხებს შორის და ირანი მხარს დაუჭერს ამ ინიციატივებს.

„ჩინეთმა და რუსეთმა მხარი დაგვიჭირეს რთულ დროს და ჩვენ ღრმად ვაფასებთ ამ მეგობრობას.

რუსეთი ირანის ღირებული სტრატეგიული მოკავშირე და მეზობელია და ჩემი ადმინისტრაცია გააგრძელებს ჩვენი თანამშრომლობის გაფართოებას და გაძლიერებას“, – წერს ფეზეშკიანი.

რეგიონზე საუბრისას ირანის ახლადარჩეულმა პრეზიდენტმა აღნიშნა, რომ რეგიონი დიდი ხანია განიცდის ომებს, რელიგიათაშორის კონფლიქტებს, ტერორიზმს, ექსტრემიზმს, ნარკომანიას, წყლის დეფიციტს, ლტოლვილთა კრიზისს, გარემოს დეგრადაციასა და საგარეო ჩარევას. „მოვიდა დრო, რომ გადავწყვიტოთ ეს საერთო პრობლემები მომავალი თაობების საკეთილდღეოდ; თანამშრომლობა იქნება ჩვენი საგარეო პოლიტიკის სახელმძღვანელო პრინციპი“, – აღნიშნა ირანის პრეზიდენტმა თავის მიმართვაში.